Conta cuenta cerca nos grandinan

E aña aki un biaha mas, loke ta pa di ocho (8) aña caba cu Biblioteca Nacional Aruba a organisa su simannan di conta cuenta den un temporada di tres luna. Di e manera aki biblioteca kier contribui na tene actividadnan alegre pa nos grandinan cu ta biba na e diferente ‘cas pa nos grandinan’ manera e.o. Paviljoen San Pedro,  Huize Maris Stella Savaneta, SABA San Nicolas y Cas Marie Savaneta. Durante e periodo aki cada cas ta haya bishita di tres diferente contado, cada luna uno.

E projecto ‘Conta Cuenta Na Casnan di Anciano 2014’ tabata bou di encargo di e dos Bibliotecarianan Yosmar Sneek y Olivia Figaroa y e aña aki Quota Club a duna un contribucion.

E biaha aki conta cuenta den luna di april tabata turno di e conocido poeta Ruthy Vrieswijk-Bergen conoci como Lady Ruth autor di cuater buki incluso un di poesia, kende manera custumber a declama su poesianan y tambe a conta storia di Compa Nanzi. Ruthy na su manera, esta esun cu ta Ruthy so por, e tabata sa di entretene y haya atencion di tur presente pa su actuacion cu su decoracion di tur colo y su paraplu. 

E luna di mei tabata di e tambe conocido Munye Oduber-Winklaar, autor di e bukinan ‘Asina y awo mi ta regla cuenta cu bo’ y ‘Shelo Santo unda nos ta bay’. Esaki no ta di prome biaha cu Munye ta colabora cu ‘E Projecto Conta Cuenta’. Munye tambe tin su manera unico pa entretene nos grandinan, dor di conta kico bo por haci cu e obhetonan,  cu el a trece. Y mientras cu e ta conta e ta laga e grandinan como sifuera hunga cu nan. ??? Den pasado el a yega di conta di cusinchi y a trece un cantidad di cusinchi di tur tamaño y forma. E biaha aki el a conta di bala. Bala chikito, bala grandi. Bala moli, bala duro y asina por sigui.    

E luna di juni tabata na encargo di e autor di e bukinan, ‘Perseverancia’ y ‘E Schutter’, Sr. Marco Christiaans. Tambe autor di e cuanto cortico cu yama ‘Sero Pela’. Marco Christiaans tambe ya a yega di colabora cu BNA y tambe a

conta for di su obranan ariba menciona. Pero e biaha aki el a dicidi di conta cuentanan di e popularisimo Compa Nanzi. Tabata bisto cu nos grandinan ta masha hopi yega na e cuentanan di Compa Nanzi. Nan interaccion cu e contado durante di e contamente tabata hopi agradabel y ta mustra cu nan ta gusta e cuentanan ey.

Marco  Christiaans a conta: ‘Con Compa Nanzi a sali Prins di Carnaval’, ‘Compa Nanzi y Bruheria’, ‘Compa Nanzi kier drenta politiek’ y ‘Compa Nanzi a tuma curso di protocol y etiketa’   

Alabes despues di cada presentacion di e contado, e grupo Zjilea dirigi pa  Chencho Kelly a deleita esnan presente cu dushi piesanan crioyo manera e.o. ‘der’e gai der’e gai’, y cu canto di e flamante damanan di biblioteca.

E proyecto aki a termina diahuebs 26 di juni cu contamento y dushi musica pa nos grandinan na S.A.B.A San Nicolas.

Na clausura Astrid Britten directora di Biblioteca a gradici tur esnan envolvi den e proyecto pa nan bunita colaboracion. Por menciona Quota Club, Instituto di Cultura, Archivo Nacional Aruba, personal di BNA y pa no lubida  e autornan.





Biblioteca Nacional Aruba
George Madurostraat 13
Oranjestad Aruba
Phone +297 582-1580
Fax +297 582-5493
www.bibliotecanacional.aw
info@bibliotecanacional.aw

Branch San Nicolas
Peter Stuyvesantstraat z/n
San Nicolas Aruba
Phone +297 584-5277 /
+297 584-3939
Fax +297 584-5004


Dept. Arubiana/Caribiana
Bachstraat 5
Oranjestad Aruba
Phone +297 582-6924

Facebook   Google+ YouTube Pinterest LinkedIn