Conta cuenta

Na casnan di Anciano

Proyecto di Conta Cuenta ta sigui cu Ruthy Vrieswijk

Ruthy Vrieswijk-Bergen a prepara un presentacion special pa e e proyecto anual Conta cuenta na casnan di Anciano. E proyecto Contamento di cuenta pa nos grandinan ta un proyecto cu e meta pa stimula lesamento y contamento di storia. E aña aki biblioteca por conta cu presentacion di sra. Frida Vrolijk, Ruthy Vrieswijk-Bergen y sr. Roberto Croes. Despues di e presentacionnan di Frida ta toca turno na Ruthy.

Bibliotecarianan di Biblioteca Nacional Aruba hunto cu autornan local y poeta ta bishita e casnan di anciano y ta presenta un programa di 1 ora cada siman. E programa ta varia cu contamento di cuenta, declamacion di poesia y na final ta pasa un documentario cortico. E proyecto tin un duracion di 3 luna.

Na mei sra. Ruthy Vrieswijk-Bergen ta cuminsa cu su presentacion na St. Michael paviljoen na playa. Sra. Ruthy Vrieswijk-Bergen ta duna 4 presentacion na diferente cas, sigui pa sr. Roberto Croes cu ta duna diferente presentacion na juni.

Sra. RuthyVrieswijk-Bergen (’57) na cuminsamento di 2013 a entrega 2 obra na directora di biblioteca, sra. Astrid Britten. “Sigui inspira...pa duna” y “Poemanan di Ruthy” ta publicacionnan cu ta contene poesia, storia y potret di Ruthy”. Ruthy tin su programa na Radio Kelkboom pa hopi aña caba y tambe e ta skirbi pa corant. Lady Ruth tin na total 5 CD di poema na Papiamento cu algun na Hulandes y Ingles riba su nomber y 3 CD cu algun cancion di Pasco y dia di tata y otro produccion.

Despues di e presentacion di Ruthy ta presenta un documentario cortico di e mama di cultura, sra. Bernadina Growell. Esakinan ta produccionnan special di Servico Audiovisual di Biblioteca. Dor di wak e documentario di un faceta di historia cultural di Aruba hopi recuerdo lo bin ariba cu por comparti. Otro meta di e proyecto aki ta pa yuda tene e habitantenan di e casnan socialmente activo banda di promocion di lesamento.





Biblioteca Nacional Aruba
George Madurostraat 13
Oranjestad Aruba
Phone +297 582-1580
Fax +297 582-5493
www.bibliotecanacional.aw
info@bibliotecanacional.aw

Branch San Nicolas
Peter Stuyvesantstraat z/n
San Nicolas Aruba
Phone +297 584-5277 /
+297 584-3939
Fax +297 584-5004


Dept. Arubiana/Caribiana
Bachstraat 5
Oranjestad Aruba
Phone +297 582-6924

Facebook   Google+ YouTube Pinterest LinkedIn