Contador di cuenta, Kathleen Thielman, ta bishita scol

Biblioteca Nacional Aruba ta contento di por presenta Kathleen Thielman, autora Boneriano riba e  programa di e Festival di Buki pa Mucha 2013.

Kathleen a skirbi e cuenta: ‘Bito ku su bala di leter’. Kathleen a traha mas cu 10 aña como maestra di prome ciclo na Colegio Cristu Bon Wardador na Boneiru. Kathleen a duna les na mucha di kleuter y tambe na mucha di 1e y 2e klas. Kathleen ta gusta traha cu mucha y e ta gusta duna les y ta traha tur dia cu hopi smak.

Kathleen tin su mes programa di mucha tur diasabra na radio Energia ‘E koto di alegria’ cu ta pa e curason di mas chikito te cu esun di mas grandi. E ta hopi contento cu e invitacion pa e Festival di Buki pa Mucha na Aruba.

Su presentacion pa e siman di buki ta bay ta un cuenta hopi leuk. Un cuenta den forma di drama, cantica y movecion cu popchi. Kathleen a skirbi e cuenta en conexion cu e tema di siman di buki. E nomber di e cuenta ta: ‘Bito ku su bala di leter’. Bito ta un mucha homber cu tur dia su mama ta papia cun’e pa e tene su mes na reglanan den futbol, pero semper e ta wordo persigui door di otro muchanan den e wega cu cos ta sali for di man. Tur wega ta bira un desordo. Si bo kier sa kico ta pasa cu Bito keda pendiente. Kathleen su deseo ta cu hopi mucha sera conoci cu e cuenta y con su persona lo trece esaki dilanti.

Den siman di 1 pa 8 di November e grupo di escritor y contado di cuenta lo bishita 65 scol cu presentacionnan atractivo y diverso. Pa muchanan cu no ta haya un bishita di autor na scol tin un programa di actividad na biblioteca merdia. Tur mucha ta invita pa e fiesta di apertura diabierna dia prome di november dilanti biblioteca pa 5 or di atardi. Tur actividad ta gratis.





Biblioteca Nacional Aruba
George Madurostraat 13
Oranjestad Aruba
Phone +297 582-1580
Fax +297 582-5493
www.bibliotecanacional.aw
info@bibliotecanacional.aw

Branch San Nicolas
Peter Stuyvesantstraat z/n
San Nicolas Aruba
Phone +297 584-5277 /
+297 584-3939
Fax +297 584-5004


Dept. Arubiana/Caribiana
Bachstraat 5
Oranjestad Aruba
Phone +297 582-6924

Facebook   Google+ YouTube Pinterest LinkedIn