Contribucion fantastico pa Festival di Buki pa Mucha

Biblioteca a invita autornan y ilustradornan di buki pa mucha pa su Festival grandi cu ta habri diabierna awor. Publico por cera conoci cu tur durante e presentacion cu ta cuminsa 6or patras di biblioteca na Playa. For di Surnam a invita Indra Hu-Ramdas y Sandra Purperhart. Indra Hu ta participa pa e di tres biaha. For di Corsou ta bini Leo Regals y Roland Colastica. Roland Colastcica ta bon conoci den comunidad di Aruba como un artista cu ta entretene publico di tur edad. For di Boneiro ta presenta Monica Clarinda.

Monica Clarinda  a specialisa su mes riba buki di historia di Boneiro pa mucha. Indra Hu ta presenta su buki nobo pa mucha cu e tema ‘Opa en Oma’, El a skirbi esaki specialmente pa e Festival di Buki pa Mucha 2016, titulo ta ‘Rosalie, oma’s danseresje’. Sandra Purperhart ta skirbi e canticanan pa e bukinan di Indra Hu. E ta gusta declama, conta storia y compone musica y e ta skirbi storia cortico. Roland Colastica ta actor, autor y e tin mucha mas talento. Roland a participa hopi biaha na e Festival di Buki pa Mucha. Na 2006 Roland a gana e Cola Debrot Cultuurprijs pa su contribucionnan na literatura y cultura.  Recientemente a traduci e ultimo buki di Roland “Vuurwerk in mijn hoofd” na Spaño. Esaki den cuadro di Feria del Libro na Colombia y actualmente Roland, kende a caba di participa den Kinderboekenfestival na Hulanda, ta na Colombia pa ricibi un premio pa su obra. Leo Regals ta participa pa prome biaha na e festival pero e ta un autor di buki pa mucha ya pa hopi aña caba. Leo Regals ta skirbi na 4 idioma y a gana e ‘Tapushi literario’ na Corsou y na Cuba ‘el premio de la humildad Dora Alonso’ Leo lo bay conta muchanan di scol con ta skirbi un buki. Mucho mas informacion di tur participante riba e website di biblioteca.

Bishita na scol

Como 60 scol rond Aruba ta haya bishita di un autor of ilustrador otro siman pa un presentacion special den klas. Muchanan cu no ta haya bishita na scol ta bon bini den biblioteca na Playa of na San Nicolas na Sta. Teresita Center. Tur actividad ta cuminsa 3or di atardi.

Buki di Festival

Cariño di Siman di Buki pa Mucha 2016 ta na libreria. Esaki ta un buki nobo pa mucha na 2 idioma, Papiamento y Hulandes. E buki su titulo ta ‘Super wela den coma’ (na Hulandes ‘Superoma in coma’). E buki ta un regalo den cuadro di e Festival di buki pa mucha. Cu cada compra di buki na libreria di 25 florin of mas ta haya e buki aki gratis (tanten cu tin den stock). Cu esaki biblioteca conhuntamente cu e librarianan local participante na e Festival di Buki kier stimula lesamento un poco mas. 





Biblioteca Nacional Aruba
George Madurostraat 13
Oranjestad Aruba
Phone +297 582-1580
Fax +297 582-5493
www.bibliotecanacional.aw
info@bibliotecanacional.aw

Branch San Nicolas
Peter Stuyvesantstraat z/n
San Nicolas Aruba
Phone +297 584-5277 /
+297 584-3939
Fax +297 584-5004


Dept. Arubiana/Caribiana
Bachstraat 5
Oranjestad Aruba
Phone +297 582-6924

Facebook   Google+ YouTube Pinterest LinkedIn