Curt Fortin autor di e Regalo di Siman di Buki 2015

Biblioteca Nacional Aruba ta percura pa presenta un buki di regalo tur aña den Festival di Buki pa Mucha. E ta un publicacion special caminda ta acerca un autor y un ilustrador pa haci esaki. E buki aki ta un regalo cu Festival di Buki pa Mucha ta duna cu cada compra di un buki na un di librerianan participante na e evento aki. Tur scol participante lo ricibi un cantidad di e buki aki como regalo.

E apertura di FBM lo tuma lugar e aña aki diabierna 30 di october dilanti di BNA. Pa e aña 2015 a scohe e conocido autor Arubiano Curt Fortin, kende ta biba na Hulanda, pa skirbi e buki cu ta carga e titulo: “Reu....reu...Reuzeslang!”/ Un co...co....colebra grandi!

E buki aki ta wordo ilustra door di Mariella v/d Beek y traduci na Papiamento door di Lilian Semeleer di Biblioteca Nacional Aruba, conhuntamente cu Olga Orman.

Curt Fortin a nace na Aruba, 27 di september 1978. E ta actor di e serienan Hulandes: Onderweg Naar Morgen’ y ‘Bon Bini Beach, presentado di e programa: Top of the Pops y un programa di tv pa mucha, HoelaHoep . E la forma parti di un banda musical como cantante y pianista. Famia Fortin a imigra pa Hulanda tempo cu Curt tabatin cinco aña di edad.

Recientemente Curt Fortin a gana: Hotze de Roosprijs cu e Buki, ‘Yakanuko’.  Esey ta e premio mas importante cu ta wordo otorga na autornan debutante di buki di mucha. 

Na cuminsamento di september 2015, BNA lo tin un conferencia di prensa caminda Curt lo wordo entrevista via ’Skype’ desde Hulanda. E muchanan cu ta bishita BNA cu frecuencia lo haya oportunidad di haci Curt preguntanan tocante di su buki cu ta cosechando hopi exito na Hulanda.  Adhunto bo ta mira e portada di e buki cu a gana premio.

Lema di Festival di Buki pa Mucha (FBM) ta: “Ra ra ra, con por ta? Lesa pa bo sa!”. E tema ta basa riba ciencia y tecnologia. http://www.noordhollandsdagblad.nl/stadstreek/zaanstreek/article27417190.ece/Curt-Fortin-en-Nick-van-Leent-winnen-Hotze-de-Roosprijs





Biblioteca Nacional Aruba
George Madurostraat 13
Oranjestad Aruba
Phone +297 582-1580
Fax +297 582-5493
www.bibliotecanacional.aw
info@bibliotecanacional.aw

Branch San Nicolas
Peter Stuyvesantstraat z/n
San Nicolas Aruba
Phone +297 584-5277 /
+297 584-3939
Fax +297 584-5004


Dept. Arubiana/Caribiana
Bachstraat 5
Oranjestad Aruba
Phone +297 582-6924

Facebook   Google+ YouTube Pinterest LinkedIn