Curt Fortin autor di e Regalo di Siman di Buki 2015

Biblioteca Nacional Aruba ta presenta tur aña un buki di regalo nobo pa Festival di Buki pa Mucha. Ta acerca un autor y un ilustrador pa traha riba un publicacion special. E buki aki ta un regalo den cuadro di Festival di Buki pa Mucha cu cada compra di un buki na un di librerianan participante. Tur scol participante lo ricibi un cantidad di e buki aki como regalo. E apertura di FBM ta tuma lugar diabierna dia 30 di october dilanti di biblioteca na Playa.

Pa e aña 2015 a scohe e conocido autor Arubiano Curt Fortin, kende ta biba na Hulanda, pa skirbi e buki cu ta carga e titulo: “Reu....reu...Reuzeslang!”/ Un co...co....colebra grandi! Mariella v/d Beek a ilustra e buki pa mucha y el a wordo traduci na Papiamento door di sra. Lilian Semeleer di Biblioteca Nacional Aruba, conhuntamente cu Olga Orman.

Curt Fortin a nace na Aruba, 27 september 1978. E ta actor di e serienan Hulandes: ‘Onderweg naar Morgen’ y ‘Bon Bini Beach’, presentado di e programa: ‘Top of the Pops’ y un programa di television pa mucha, ‘HoelaHoep ‘. El a forma parti di un banda musical como cantante y pianista. Famia Fortin a imigra pa Hulanda tempo cu Curt tabatin cinco aña di edad. Recientemente Curt Fortin a gana: Hotze de Roosprijs cu e buki, ‘Yakanuko’.  Esey ta e premio mas importante cu ta otorga na autornan debutante di buki pa mucha.

Na cuminsamento di september 2015, biblioteca lo tin un conferencia di prensa caminda Curt lo wordo entrevista via ’Skype’ desde Hulanda. E muchanan cu ta bishita biblioteca cu frecuencia lo haya oportunidad di haci Curt pregunta tocante di su buki cu ta cosechando hopi exito na Hulanda.  Lema di Festival di Buki pa Mucha (FBM) ta: “Ra ra ra, con por ta? Lesa pa bo sa!”. E tema ta basa riba ciencia y tecnologia.





Biblioteca Nacional Aruba
George Madurostraat 13
Oranjestad Aruba
Phone +297 582-1580
Fax +297 582-5493
www.bibliotecanacional.aw
info@bibliotecanacional.aw

Branch San Nicolas
Peter Stuyvesantstraat z/n
San Nicolas Aruba
Phone +297 584-5277 /
+297 584-3939
Fax +297 584-5004


Dept. Arubiana/Caribiana
Bachstraat 5
Oranjestad Aruba
Phone +297 582-6924

Facebook   Google+ YouTube Pinterest LinkedIn