Den kibra di marduga: aurora di un lenga crioyo: Papiamento

“Den kibra di marduga: aurora di un lenga crioyo: Papiamento”

Celebracion di Dia Internacional di Lenga Materno na Aruba

Fundacion Lanta Papiamento, conhuntamente cu Biblioteca Nacional Aruba, Grupo di Corector Papiamento y Departamento di Cultura di Aruba, den cuadra di Aña di Papiamento y pa celebracion di Dia Internacional di Lenga Materno na Aruba, ta organisa un anochi den Biblioteca Nacional na Madurostraat diahuebs dia 21 di februari 2013 cuminsando pa 7:30 or.                                                                        

Na aña 1999 UNESCO a dicidi di institui un Dia Internacional di Lenga Materno cu lo mester a celebra den henter mundo dia 21 di februari di cada aña. UNESCO a institui e dia aki cu e fin di promove diversidad linguistico y enseñansa multilingual y pa enfatisa un conscientisacion mas profundo di e importancia di enseñansa den lenga materno. E prome biaha cu internacionalmente a celebra e dia aki tabata na aña 2000.                  

Na Aruba a cuminsa celebra Dia Internacional di Lenga Materno na aña 2003 cu un actividad organisa pa UNESCO Aruba, den cual Ramon Todd Dandaré Mag. Ling. a tene un charla den Aula di Universidad di Aruba. Den e charla ey e orador a presenta un informe tocante origen y evolucion di Papiamento den un constelacion colonial, e auge di e lenga, e trastornonan cu e lenga a pasa aden, e obstaculonan cu mester a vence y e lucha cu a hiba continuamente pa Papiamento por a haya reconocemento como lenga, particularmente di su propio papiadonan y specificamente den enseñansa y den comunidad en general.

Despues di esey, cada aña a sigui celebra e dia aki na Aruba. Na aña 2009 un grupo di luchado incansabel pa e causa di Papiamento a lansa Fundacion Lanta Papiamento, cu tin como meta principal promocion y reconocemento di e status di Papiamento na tur nivel y den tur estrato. Un di e actividadnan cu e Fundacion a fiha pa realisa tur aña ta e celebracion aki di Dia Internacional di Lenga Materno. E lema cu UNESCO a fiha pa e aña aki ta “Buki pa enseñansa den lenga materno”, cu cual UNESCO kier corda e actornan mas importante den enseñansa cu pa por sostene enseñansa den lenga materno, ta esencial pa sostene produccion di buki den e lenga materno, den nos caso buki na Papiamento primordialmente.                                                                                                               Pa tal motibo Fundacion Lanta Papiamento, conhuntamente cu Biblioteca Nacional Aruba, Grupo di Corector Papiamento y Departamento di Cultura di Aruba, den cuadra di Aña di Papiamento y pa celebracion di Dia Internacional di Lenga Materno na Aruba, ta organisa un anochi den Biblioteca Nacional na Madurostraat diahuebs dia 21 di februari 2013 cuminsando pa 7:30 or.                                                                        

Den un charla titula “Den kibra di marduga: aurora di un lenga crioyo: Papiamento” Ramon Todd Dandaré Mag. Ling. lo pasa revista na e prome manifestacionnan di Papiamento den forma skirbi. Magister Todd Dandaré, entre otro, lo trata den forma interactivo cu e audiencia dos carta skirbi na Corsou na final di siglo 18 y un carta skirbi na Aruba na cuminsamento di siglo 19 y e audiencia lo siña conoce diferente buki cu a sali publica na Papiamento den siglo 19, tanto na Corsou como na Aruba. Ademas di e charla, Pedro Velásquez lo tene un introduccion, Gwendy Sneek lo deleita e publico cu poesia y Jossy Brokke y Etty Toppenberg cu musica na Papiamento. Tur hende ta bonbini na e anochi aki, di cual sigur sigur nan lo no sali desapunta.                                                                                                               

Den un otro comunicado pueblo di Aruba ta haya informacion di e otro actividad relaciona cu Dia Internacional di Lenga Materno, esta e Gran Dictado di Papiamento, cu lo wordo teni diasabra dia 23 di februari 2013 den Cas di Cultura.

 





Biblioteca Nacional Aruba
George Madurostraat 13
Oranjestad Aruba
Phone +297 582-1580
Fax +297 582-5493
www.bibliotecanacional.aw
info@bibliotecanacional.aw

Branch San Nicolas
Peter Stuyvesantstraat z/n
San Nicolas Aruba
Phone +297 584-5277 /
+297 584-3939
Fax +297 584-5004


Dept. Arubiana/Caribiana
Bachstraat 5
Oranjestad Aruba
Phone +297 582-6924

Facebook   Google+ YouTube Pinterest LinkedIn