Desiree Correa

Un festival di buki pa mucha cu saus crioyo

Desiree Correa  ta un fiel participante y pilar di e festival di buki pa mucha di biblioteca. Esaki ta e di 20 edicion di e famoso festival di buki pa mucha cu biblioteca ta organisa cu e meta pa stimula mucha pa lesa y pa stimula combersacion y interes pa autor di buki pa mucha como tambe ilustrador.

Cada aña e festival tin otro tema y un grupo di autor y ilustrador di buki pa mucha for di Aruba, islanan di Caribe Hulandes, Hulanda y otro pais ta bishita sesenta scol riba nos isla. E tema di e aña 2012 ta “ Multiculturalidad” y e lema ta: ‘Nos mundo ta draai y ami ta sigui lesa bay’. E festival di buki pa mucha ta tuma lugar den e siman di 2 pa 9 di November 2012.

Naci na Aruba di mayornan Colombiano, Desiree Correa no ta un desconoci den e mundo di lectura aki na Aruba. Desde su debut cu e buki na Hulandes pa hobennan, ‘Mosa’s Eiland’, na aña 1984, cual buki keto bay ta hopi lesa, Desiree a sigui produci obranan, pero awor pa mucha y pa hoben na Papiamento.

Varios buki a sigui despues di Mosa’s eiland, por ehempel: ‘Un Nomber pa e Prinses’, ‘Compa Nanzi’, ‘Drumi dushi’ y ‘Manuel’.

Riba tereno educativo e ta co-autora di ‘Un chispa di tempo’, un metodo di historia pa nos enseñansa basico. Desiree tin 15 aña participando na e Festival di Buki pa Mucha. Na aña 2003 el a skirbi e buki pa e Festival di Buki pa Mucha yama ‘Domi di den mondi’ / ‘Domi van het bos’. Na 2008 el a skirbi ‘Manuel’, un buki pa teenager. Na 2011 Desiree a skirbi e buki “Pepe Picuda y Didi Djindja” cu a bira e Cariño di Siman di Buki di 2011.

Den cuadro di Festival di Buki di Mucha, Desiree a biaha pa varios isla di Caribe Hulandes promoviendo lesamento. Riba invitacion di embahada di Hulanda, cu cooperacion di Oficina di Turismo, el a participa na e Feria del Libro na Bogota, Colombia den forma di workshops y presentacionnan. Hunto cu Freddy Montoya (e parti artistico), Desiree Correa a forma un duo pa cuentanan pa cash’i cuenta esta “Poppenkast’ y ya nan tin varios presentacion haci pa e organisacion LET’S TALK. Den su tempo liber Desiree ta haci hopi traduccion y naturalmente e ta sigui cu e pasion di su bida cu ta skirbimento.

Desiree ta un di e fundadornan di Hofi Literario, unda autornan den un ambiente agradabel ta declama nan poema of conta storia. E aña aki el a traduci hunto cu Olga Buckley e buki “Prinses Ivana” di Hilli Arduin (Surnam/Corsou).

Festival di buki pa mucha
Pa un siman largo biblioteca ta presenta un festival di buki atractivo y diverso.

Diferente autor y ilustrador di Aruba, Corsou, Bonaire, Sint Maarten, Hulanda, Jamaica y Surman ta participa na e festival anual. Muchanan di scol por spera presentacion di: Hulanda: Mylo Freeman, Tjibbe Veldkamp, Evelien van Dort y Sjoerd Kuyper. Corsou: Tio Ali (Alvin Inecia), Roland Colastica. Boneiro: Tio Gabi(Gabriel Mercera), Kathleen Thielman. St.Maarten : Loeki Morales, Surnam : Hilli Arduin, Jamaica : Amina Blackwood Meeks, Aruba: Robert Reeberg, Olga Buckley, Desiree Correa, Mariebelle Arends, Dolfi Kock, Dora Lauffer-Mathilda, Noris van Lis-Donata, Olga Orman.

 





Biblioteca Nacional Aruba
George Madurostraat 13
Oranjestad Aruba
Phone +297 582-1580
Fax +297 582-5493
www.bibliotecanacional.aw
info@bibliotecanacional.aw

Branch San Nicolas
Peter Stuyvesantstraat z/n
San Nicolas Aruba
Phone +297 584-5277 /
+297 584-3939
Fax +297 584-5004


Dept. Arubiana/Caribiana
Bachstraat 5
Oranjestad Aruba
Phone +297 582-6924

Facebook   Google+ YouTube Pinterest LinkedIn