Di dos rondo Quiz di lesamento pa scolnan special

Diabierna  27 di februari  Fundacion Bon Nochi Drumi Dushi ta sigui cu e di dos rondo di Quiz di lesamento pa aña escolar 2014-2015 entre e scolnan special di Aruba. Den e rondo aki Scol Paso pa Futuro y  Emmaschool tin cu demostra cua di nan a lesa e buki ‘Bencho ta gana un bais’ di escritora Olga Buckley cu mas atencion.

E quiz di lesamento ta un actividad cu directiva di FBNDD a desaroya conscientemente cumpliendo asina cu e planificacion di termino largo manera describi den e proyecto for di su inicio. Punto di salida ta diversificacion di e productonan di promocion di lesamento y ampliacion di e grupo meta.

Den planificacion di e quiz pa scolnan basico a incorpara un fase di tres tanda bou di e tres scolnan di enseñansa special. Meta di e quiz ta pa ofrece e alumnonan di grupo 6 y 7 di scol special, cu pronto lo pasa pa enseñansa avansa, un forma creativo pa analisa un buki y profundisa riba su contenido. Directiva di FBNDD ta motiva e docentenan di grupo 6 y 7 pa lesa e buki cu tur mucha y asina forma un grupo mas grandi di lesado pa e buki cu lo wordo trata durante e quiz. Cada scol ta participa cu un di team di 6 alumno. Un cuerpo di hurado hopi experiencia riba tereno di literatura hubenil ta dicidi riba e resultado di e quiz.

E Quiz di lesamento ta parti den 4 seccion. E prome parti, “ Bruha lenga”,  ta un introduccion y no ta conta den e punctuacion. Den e di dos seccion e participante mester resolve algun charada y dramatisa cierto parti di e buki. Den e di tres seccion e participantenan mester defende nan conocemento di e buki cu nan a lesa y di e biografia y bibliografia di e autor. Den e di cuater seccion e escritor di e buki ta intercambia ideanan cu e muchanan participante y e publico presente.

Pa e prome tanda Scol Caiquetio y Scol Paso Pa Futuro a competi cu otro riba nan conocemento di e buki Isla di Mosa di autora Desiree Correa. E competencia tabata hopi preta y tension tabata halto. Finalmente Scol Caiquetio a logra acumula e cantidad mas halto di punto pa gana e prome tanda. Dominio di contenido di e buki y e habilidad di e participantenan pa formula nan contesta corectamente a resalta grandemente. Banda di e hecho cu nan a preparara hopi bon, e bentaha di instruccion den nan lenga materno na scol, tabata remarcabel. Por a nota cu e participantenan di ambos scol tabata sinti nan mes na smak.

E di dos tanda lo tuma luga dia 27 di  februari entre Emmaschool y Scol Paso pa Futuro y di tres tanda na mei entre Scol Caiquetio y Emmaschool. E puntonan ta sigui conta y na final di e di tres tanda lo conta tur punto pa saca e  ganador y e dos finalistanan.

Comision Quiz di Lesamento y directiva di FBNDD ta gradici e scolnan pa prepara e studiantenan y e studiantenan pa nan interes y empeño.





Biblioteca Nacional Aruba
George Madurostraat 13
Oranjestad Aruba
Phone +297 582-1580
Fax +297 582-5493
www.bibliotecanacional.aw
info@bibliotecanacional.aw

Branch San Nicolas
Peter Stuyvesantstraat z/n
San Nicolas Aruba
Phone +297 584-5277 /
+297 584-3939
Fax +297 584-5004


Dept. Arubiana/Caribiana
Bachstraat 5
Oranjestad Aruba
Phone +297 582-6924

Facebook   Google+ YouTube Pinterest LinkedIn