Dia internacional di Boluntario!

Dia 7 di december ta Dia Internacional di Boluntario

Trabao di boluntario ta e curason bibo di un comunidad y e ta haci esaki mas bunita y mas fuerte. Nos ta papia di desaroyo di comunidad, contribui na e desaroyo di bo bario, club of comunidad. Un cos chikito por haci un diferencia grandi pa un otro. Tin hopi manera pa haci un otro contento of yuda un rato. Y tin hopi hende y organisacion cu mester di ayudo.

Un boluntario ta un persona cu ta yuda un otro persona of un organisacion sin pidi of spera nada bek. E ta duna un poco di su tempo y su energia pa yuda. Kizas e ta colecta placa pa un bon causa, bende rifa pa un fundacion, yuda organisa un actividad. Of kizas e ta pasa bishita un persona cu ta su so y un poco isola. Pasa cumpra comestibles na supermercado pa un hende cu ta malo na cas. Hinca bo tempo den un bon causa lo duna bo un satisfaccion y para pa algo ta desaroya bo auto-estima.

Pakico tin hende ta traha por nada?

Tin boluntario di tur edad, cu un educacion riba tereno social of tecnico...., of sin educacion formal. Hende homber, hende muher, hoben of hende grandi, trahando of no trahando, druk of no druk. Tur e hendenan aki ta bira boluntario pa diferente motibo. Tin ta hacie cu un vision cu mester haci algo bon den comunidad, otro kier desaroya nan mes y otro kier un pasatempo agradabel.  E por tin di haber cu un hobby of un interes. Boluntarionan ta combina un pasatempo interesante cu ‘haci algo pa un otro’.

E motibonan principal pa haci trabao boluntario ta: engrandece experencia di bida, keda activo y bon di salud, siña y practica abilidad, wak resultado, pa principionan moral, conviccion politico of religioso, haya aprecio y reconocimento social.

Hopi biaha e boluntario tin un lazo caba cu e organisacion caminda e ta contribui of cu e persona cu e ta yuda. Trabao boluntario no tur ora ta pidi un educacion of experencia di trabao specifico. Djis loyalidad, dedicacion, un bon curason, interes pa e actividad, interes pa e persona cu ta ricibi e ayudo, motivacion, duna bo tempo, esakinan ta importante.

Esnan interesa pa haci trabao di boluntario por traha diferente caminda. Practicamente tur service clubs, fundacion, centro di bario, clubnan di deporte, cas di cuido, scol, biblioteca, organisacion cu ta proteha y cuida bestia, servicionan di rescate, misa, gruponan cu ta cuida nos naturalesa mester di hende pa yuda.

Prome cu cuminsa busca bo por haci bo mes algun pregunta cu lo dirigi bo den direccion cu bo kier bay, manera por ehempel, kico mi ta bon den dje?, kico mi ta gusta haci?, Kico mi kier siña haci miho?, unda mi ta gusta di ta? Paden, pafor? Cerca di cas? Leu?, Mi ta prefera di ta cu hende? Mi so? Ki tipo di hende mi kier ta cu ne? Hende jong of hende grandi? Mi ta mas comfortabel cu grupo? Mi ta prefera trata cu hende individual? Kico mi kier saca afo? Na unda tin problema den mi comunidad cu mester di solucion? Kico ta afecta mi of interesa mi mas hopi?

Ta un cuestion di informa rond na unda mester hende. Yama e organisacion of club di bo escohencia y ofrece bo ayudo.

Fuente:

  • Vrijwilligerswerk : wat mensen bezielt / Andries Greiner, AO 2891, 2007
  • Volunteerism and older adults / Mary K. Kouri
  • Lend a hand : the how, where and why of voluteering / Sarah Gilbert
  • Sugerencia pa sigui lesa: Geef en verander de wereld / Bill Clinton

 

 





Biblioteca Nacional Aruba
George Madurostraat 13
Oranjestad Aruba
Phone +297 582-1580
Fax +297 582-5493
www.bibliotecanacional.aw
info@bibliotecanacional.aw

Branch San Nicolas
Peter Stuyvesantstraat z/n
San Nicolas Aruba
Phone +297 584-5277 /
+297 584-3939
Fax +297 584-5004


Dept. Arubiana/Caribiana
Bachstraat 5
Oranjestad Aruba
Phone +297 582-6924

Facebook   Google+ YouTube Pinterest LinkedIn