Dia Internacional di Idioma Materno

Biblioteca Nacional Aruba ta celebra Dia Internacional di Idioma Materno cu un programa interesante diahuebs awor. E programa ta cuminsa 7or di anochi y ta  pa un y tur cu tin interes pa historia di Aruba, idioma, literatura y cultura.

Riba programa tin presentacion di un buki di Dr. Antoine Maduro, Dr. Maduro ta un persona cu tin merito riba tereno musical y deporte, pero principalmente riba tereno linguistico. Banda di studia Papiamentu?, el a studia tambe Capverdiano y Palenke. Palenke ta un idioma crioyo di Colombia.

Maduro a dedica henter su bida na Papiamentu y pesey a scoge pa presenta su buki cu e titulo: ‘Bida, Remordementu, Konfeshon i Kritika’ riba Dia Internacional di Idioma Materno. Sr. Sidney Joubert ta e invitado special di Corsou cu ta haci presentacion di e buki. Riba portada di e buki aki un pintura cu señor Elis Juliana a traha di Antoine Maduro.

E dia ta dedica tambe na George Maduro, cu ta nomber di e caya unda cu Biblioteca Nacional Aruba ta situa. Esaki mirando cu ta 100 aña pasa cu George Maduro a nace. Raymond Maduro, descendiente di George Maduro,  a biba den George Maduro straat varios aña pasa y ta invitado pa e anochi aki. Sr. Maduro ta  papia di e descendencia di famia Maduro y con e mes ta relaciona cu e famia Maduro. Raymond Maduro a pasa den su bukinan bieu y den historia, pa e trece dilanti algo di locual e sa di famia Maduro.

E ta bay conta entre otro di unda famia Maduro a bin y con nan a yega Aruba. Di tres presentacion ta den man di sr. Mirto Lacle cu ta bay trece dilanti ‘E cuentanan Africano bulado: e liña Kalunga. Por ultimo un presentacion di Prof. Dr. Armin Schwegler kende a skirbi dos buki, incluyendo un di Proverbio na Africano. E ta papia entre otro riba Aruba, Boneiro y Corsou y e posibel origen di e lenga crioyo. Un programa yen di informacion balioso y interesante. Y sigur inspiracion pa discusion.

 





Biblioteca Nacional Aruba
George Madurostraat 13
Oranjestad Aruba
Phone +297 582-1580
Fax +297 582-5493
www.bibliotecanacional.aw
info@bibliotecanacional.aw

Branch San Nicolas
Peter Stuyvesantstraat z/n
San Nicolas Aruba
Phone +297 584-5277 /
+297 584-3939
Fax +297 584-5004


Dept. Arubiana/Caribiana
Bachstraat 5
Oranjestad Aruba
Phone +297 582-6924

Facebook   Google+ YouTube Pinterest LinkedIn