Diadomingo awor por entrega tur buki na biblioteca

Diadomingo awor biblioteca na Playa ta habri su porta pa tur buki cu ta circula den comunidad por bay biblioteca bek. Por entrega buki entre 9or y 2or di merdia, diadomingo Dia di Obrero. Biblioteca ta brinda su miembronan e oportunidad pa entrega buki cu ta laat sin paga boet.

Bukinan di biblioteca publico ta destina pa circula entre su miembronan pa distribui informacion y storia. Pa duna tur hende aceso na informacion mester percura pa por yega na esaki libremente via biblioteca. Ta un tarea importante di biblioteca. Pero tin biaha e fluho no ta bay optimal. Esaki ta sosode ora miembro ta tene buki na cas pa un periodo hopi largo. Pa kita e obstaculo di boet cu a acumula for di  caminda, biblioteca ta habri diadomingo awor pa ricibi tur su bukinan. Por trece buki tanto di biblioteca na playa como di biblioteca di San Nicolas.

Biblioteca ta duna tur hende oportunidad pa fia buki na un prijs rasonabel. Miembrecia pa adulto ta minimo 5 florin pa aña y por fia 4 buki pa tres siman. Miembrecia pa hoben ta minimo  di 3 florin y pa mucha ta minimo 1 florin pa aña. Den tur tres tipo di miembrecia tin opcion pa presta mas buki.  Por presta buki pa 3 siman. Biblioteca ta habri 5 dia pa siman non-stop. Ademas biblioteca na Playa ta habri 3 anochi den siman te 7’or, dialuna, diaranson y diabierna. Biblioteca na San Nicolas ta habri 2 anochi den siman te 7’or, diamars y diahuebs. Tur hende, adulto, hoben y mucha ta bon bini.





Biblioteca Nacional Aruba
George Madurostraat 13
Oranjestad Aruba
Phone +297 582-1580
Fax +297 582-5493
www.bibliotecanacional.aw
info@bibliotecanacional.aw

Branch San Nicolas
Peter Stuyvesantstraat z/n
San Nicolas Aruba
Phone +297 584-5277 /
+297 584-3939
Fax +297 584-5004


Dept. Arubiana/Caribiana
Bachstraat 5
Oranjestad Aruba
Phone +297 582-6924

Facebook   Google+ YouTube Pinterest LinkedIn