Diana Marchena-Martes cu storia cu tin color, rima y cantica

Diabierna awor dia 1 di november 2013 Biblioteca Nacional Aruba ta organisa su di 21 Festival di Buki pa Mucha. Esaki ta tuma lugar dilanti biblioteca na Playa. Lema di e aña aki ta: “Buki Buki den Wega, Pianan na Careda!”. Diana Marchena-Martes ta un di e autornan cu ta di bishita pa e pa e festival.

Diana a nace 23 di mei 1957 na Aruba di mayornan Boneriano. El a bay kleuterschool na San Nicolaas, scol basico y secundario na Playa, despues el a bay studia pa trahado social na Hulanda. Diana a ricibi su diploma, regresa Aruba y a casa. Ora su dos yiunan a bay scol el a bay studia atrobe na IPA pa bira juffrouw di scol. Pa basta aña Juffrouw Diana a traha na Caiquetio Scol na Cura Cabai.

Actualmente e ta traha na Departamento di Enseñansa. Eynan hunto cu otronan e ta traha na un metodo di idioma pa Enseñansa Special cu yama ‘Papiamento na Color’. Den ‘Papiamento na Color’ tin storia, rima, cantica cu Diana a contribui cu ne.

Den su hubentud no tabatin cable, internet ni telefon celular. Pesey su pasatempo tabata lesa buki y skirbi carta na su 'penvriendinnen' di Hulanda y Corsou.

Diana a participa dos biaha na Festival di Buki di Mucha como contado di cuenta. E prome biaha el a bay cu un storia di su propio inspiracion cu ta bay over di ‘Zachary y e manchanan di verf’. Di dos biaha el a interpreta diferente poesia di otro autor manera ‘Bobochi cu no ta gusta baña’ di Frances Kelly y ‘Bochincha den macuto’ di Robert Reeberg.

Tambe el a forma parti di e prome grupo di contadonan di Bon nochi Drumi Dushi y a conta storia na diferente cas tur rond di Aruba.

Ainda Diana sa drenta cas di hende pa conta storia, sin cu nan a invite. Esey ta na e casnan unda nan sa pone nan television riba e canal local, TeleAruba. Nan sa transmiti e grabacion di Bon nochi Drumi Dushi den cua Diana a participa.

Dia 20 di juni 2013 Diana a bira wela orguyoso di baby Mason cu ta biba na Merca. Regularmente nan ta Facetime', pa Oma Nana canta "Bon dia, bon dia mi Mason, bon dia mi Mason bunita!"

Den siman di 1 pa 8 di November e grupo di escritor y contado di cuenta lo bishita 65 scol cu presentacionnan atractivo y diverso. Pa muchanan cu no ta haya un bishita di autor na scol tin un programa di actividad na biblioteca merdia, tanto na Playa como na biblioteca San Nicolas. Tur mucha ta invita pa e fiesta di apertura diabierne dia prome di november dilanti biblioteca pa 5 or di atardi. Tur actividad ta gratis.





Biblioteca Nacional Aruba
George Madurostraat 13
Oranjestad Aruba
Phone +297 582-1580
Fax +297 582-5493
www.bibliotecanacional.aw
info@bibliotecanacional.aw

Branch San Nicolas
Peter Stuyvesantstraat z/n
San Nicolas Aruba
Phone +297 584-5277 /
+297 584-3939
Fax +297 584-5004


Dept. Arubiana/Caribiana
Bachstraat 5
Oranjestad Aruba
Phone +297 582-6924

Facebook   Google+ YouTube Pinterest LinkedIn