Diana Marchena

Diana Marchena-Martes ta un contado di cuenta pa e organisacion Bon Nochi Drumi Dushi. Diana ta haya cu ta hopi importante pa stimula lesamento di buki y contamento di cuenta. 

Banda cu storia ta leuk y hopi biaha tin informacion of mensahe valioso, comparti cu otro ta crea un relacion special. E ta stimula un bon comunicacion. Un buki por yuda tanto mayor y yiu pa hiba un combersacion di algo cu nan ta haya dificil pa papia di dje. Papiando di pensamento y sentimentonan di un personahe den un buki ta facilita pa papia di nan propio situacionnan. 

Despues di a traha diferente aña como maestra na Scol Caiquetio, Diana a bay traha na Desaroyo di Curiculo, un seccion di Departamento di Enseñansa. Eynan e ta den un grupo di trabou desaroyando les pa un metodo di idioma pa Enseñansa Special yama Papiamento na Color. E grupo ta skirbi storia, poesia y cantica cu ta bay den e lesnan aki.

Un deseo grandi di Diana ta pa mira hopi mas buki of grabacion informativo pa mucha na Papiamento, specialmente pa e scolnan cu e idioma di instruccion ta solamente na Papiamento. Esaki lo facilita e alumnonan den buscamento di informacion independientemente ora di por ehempel traha un charla. 

Diana a participa diferente biaha na siman di buki como contado di cuenta. Mayoria storia cu Diana a conta, el a skirbi su mes of a pone su toke den dje. Storia cu Diana a yega di conta durante di siman di buki ta entre otro: ‘Ken lo kere Zachary': e storia di un mucha cu su mama ta busc’e te laat for di scol; ‘Jack y Jacky': e morocho cu a pasa den aventura na cas di nan wela’; ‘Mi lo stima bo semper'; di e palo di kwihi cu su yiu.

Diana ta mama orguyoso di dos yiu adulto y wela di un nieto di 2 aña, kendenan no ta biba na Aruba. Hunto cu su casa Gino e ta gusta biaha y conoce diferente luga. Pero mas tanto e ta gusta bay cerca su yiunan na Merca.

 





Biblioteca Nacional Aruba
George Madurostraat 13
Oranjestad Aruba
Phone +297 582-1580
Fax +297 582-5493
www.bibliotecanacional.aw
info@bibliotecanacional.aw

Branch San Nicolas
Peter Stuyvesantstraat z/n
San Nicolas Aruba
Phone +297 584-5277 /
+297 584-3939
Fax +297 584-5004


Dept. Arubiana/Caribiana
Bachstraat 5
Oranjestad Aruba
Phone +297 582-6924

Facebook   Google+ YouTube Pinterest LinkedIn