Diana Marchena

Diana Marchena ta participa na e festival di buki. Biblioteca Nacional Aruba ta tene cuenta cu participacion di mas cu 50 scol preparatorio, basico y special riba nos isla cu lo ricibi bishita di autor, ilustrador y contador di storia. 
Diana Marchena-Martes ta un contado di cuenta pa e organisacion Bon Nochi Drumi Dushi. Diana ta haya cu ta hopi importante pa stimula lesamento di buki y contamento di cuenta. 

Diana a participa diferente biaha na siman di buki como contado di cuenta. Mayoria storia cu Diana a conta, el a skirbi su mes of a pone su toke den dje. Storia cu Diana a yega di conta durante di siman di buki ta entre otro: ‘Ken lo kere Zachary': e storia di un mucha cu su mama ta busc’e te laat for di scol; ‘Jack y Jacky': e morocho cu a pasa den aventura na cas di nan wela’; ‘Mi lo stima bo semper; di e palo di kwihi cu su yiu'.
Biblioteca Nacional Aruba ta organisa e festival aki pa promocion di lesamento y pa involvi mucha activamente den e mundo di buki cu un siman di actividad rond di buki. 

E actividadnan ta tuma lugar diferente caminda, tanto na biblioteca como na diferente scol. Tur aña ta scohe un tema central pa e festival y ta presenta un buki como e Regalo di Siman di Buki. ‘Ra…ra…ra con por ta? lesa pa bo sa!’ ta e lema di e festival y e tema ta ‘Naturalesa, ciencia y tecnologia’. Ta falta net 3 siman pa e apertura di e Festival di Buki pa Mucha. 

Apertura di e festival di buki pa mucha ta diabierna 30 di october patras di edifcio di BNA na G. Madurostraat di 5or pa 8or p.m. Scol cu ta prepara e apertura ta Scol Pius X, Dakota. Clausura  ta diabierna 6 di november na Emma School na Ayo. 





Biblioteca Nacional Aruba
George Madurostraat 13
Oranjestad Aruba
Phone +297 582-1580
Fax +297 582-5493
www.bibliotecanacional.aw
info@bibliotecanacional.aw

Branch San Nicolas
Peter Stuyvesantstraat z/n
San Nicolas Aruba
Phone +297 584-5277 /
+297 584-3939
Fax +297 584-5004


Dept. Arubiana/Caribiana
Bachstraat 5
Oranjestad Aruba
Phone +297 582-6924

Facebook   Google+ YouTube Pinterest LinkedIn