Dolfi Kock a skirbi buki di festival

Dolfi Kock a skirbi buki di festival


Un otro edicion di festival di buki pa mucha ta dilanti porta. Tur aña biblioteca ta percura pa presenta un buki di e festival. Un publicacion special. Ta acerca un autor y ilustrador (a) local pa un publicacion. E aña aki a scohe Dolfi Kock pa skirbi e buki festival 2012. E ta carga e titulo “Bon mucha???... Tur dia!!”. E buki a wordo ilustra pa Ria Arrindell-Broeks.

Dolfi KockDolfi Kock ta conta algo di su mes. “Desde cu mi a cuminsa bay scol basico un di mi hobbynan tabata lesamento. Tempo mi tabata den 6de klas mi a haya meneer Baas Williams, kende tabata e unico maestro Arubiano durante mi carera di scol. E tabata apoya nos masha hopi mes pa lesa. Cada trimester e tabata tin un premio pa esun cu a lesa mas buki fo’i e biblioteca dje klas. E premio tabata un buki. Pues e aña ey mi a gana tres buki nobis nobis.
E mesun aña ey, mi tabata tin e suerte di por a forma parti di e grupo yama “De Trupialen”. Den e grupo aki dirigi pa frère Alexius, mi a siña conoce e artenan di canto, musica, comedia, drama, actuacion y di literatura. Mi a keda miembro di e grupo aki te dia mi a caba HBS-3 na St. Dominicus College y mi a bay Hulanda pa studia pa maestro di scol na Baarle-Nassau. Esaki a haci cu durante mi estadia leu fo’i cas y fo’i mi isla mi tabata expresa mi nostalgia y mi aventuranan den un diario, skirbi naturalmente den mi idioma Papiamento. Desde e tempo ey caba mi a cuminsa skirbi rima tanto na Papiamento como na Hulandes y Ingles specialmente pa conkista e galiñanan.
Na aña 1965 mi a bolbe y mi a cuminsa traha na Abraham de Veerschool na San Nicolas. E sigiuente aña mi a ser invita pa forma parti di e elenco di Mascaruba. Tres aña mi a actua den diferente obra. Na aña 1968 a introduci un sistema di scol nobo, na unda cu A. de Veerschool a bira un scol di Mavo. Esey a haci cu tur e klasnan basico y mi persona a ser translada pa Prinses Ireneschool. Mi a traha eynan bou e direccion di meneer C. Bruce di ken mi a siña masha hopi mes. Na 1969 mi a casa cu e amor di mi bida Belen Marchena y Dios a regala nos tres yiu homber.

Na aña 1973 mi a bay traha na Julianaschool prome como gymleraar y despues como maestro di Handel/Boekhouden. Desde 1975 gobierno a nombra mi como adjunct-direkteur eynan y na 1992 mi a bira director di e mesun scol. Na september 1996 mi a baha cu pensioen y a bai traha como maestro di Handel pero parttime, atrobe na A. de Veerschool. Na 2002 si definitivamente mi a stop. Pues na e mesun scol cu mi a cuminsa mi a termina mi carera tambe.

Semper mi a keda skirbi rima si. Ora cu na 2002 Belen a pidi mi pa mi skirbi un storia pa e por a bay conta na scol, mi a nenga na prome instante. Ma el a keda insisti, y mi a dicidi pa cuminsa pone algo riba papel den rima. Pues asina mi prome storia a bira realidad y na november 2005 “E gulido golos” a keda publica y a bay e scolnan. Aña pasa e buki “E bruha brabo” a mira lus. Y awor mi a skirbi e Cariño di Siman di Buki “Bon mucha???... Tur dia!!”.
 

Ria Arrindell-Broeks
Ria Arrindell-BroeksE buki a wordo ilustra pa Ria Arrindell-Broeks. Ria ta un ilustradora di buki pa mucha conoci na nos isla. Ria a haci hopi trabou riba e tereno di arte visual. Bukinan cu el a ilustra ta p.e. Priki prikichi y prinses, Djente Chikitin ta bay keiro’. ‘Maggy Maripampun’ y ‘Tres storia Rubiano’. Ria ta docente di scol regular y special cu un trayectorio largo den enseñansa tanto na Aruba como na Hulanda. Tambe el a yuda desaroya curiculo pa Scol Scucha Nos caminda el a traha como maestra. Ria ta un persona cu amplio interes den diferente area.
 

Autor y ilustrador
Diferente autor y ilustrador di Aruba, Corsou, Bonaire, Sint Maarten,Hulanda, Jamaica y Surman a ricibi un invitacion di biblioteca pa participa na e festival anual.
Muchanan di scol por spera presentacion di: Hulanda: Mylo Freeman, Tjibbe Veldkamp, Evelien van Dort y Sjoerd Kuyper. Corsou: Tio Ali (Alvin Inecia), Roland Colastica. Boneiro: Tio Gabi(Gabriel Mercera), Kathleen Thielman. St.Maarten : Loeki Morales, Surnam/Corsou : Hilli Arduin, Jamaica : Amina Blackwood Meeks, Aruba: Robert Reeberg, Olga Buckley, Desiree Correa, Mariebelle Arends, Dolfi Kock, Dora Lauffer-Mathilda, Noris van Lis-Donata, Olga Orman.





Biblioteca Nacional Aruba
George Madurostraat 13
Oranjestad Aruba
Phone +297 582-1580
Fax +297 582-5493
www.bibliotecanacional.aw
info@bibliotecanacional.aw

Branch San Nicolas
Peter Stuyvesantstraat z/n
San Nicolas Aruba
Phone +297 584-5277 /
+297 584-3939
Fax +297 584-5004


Dept. Arubiana/Caribiana
Bachstraat 5
Oranjestad Aruba
Phone +297 582-6924

Facebook   Google+ YouTube Pinterest LinkedIn