Dos ilustrador local cu presentacion pa mucha

Biblioteca Nacional Aruba ta confirma participacion di diferente autor di buki pa mucha y ilustrador pa duna contenido na e festival grandi di buki. Ultimo preparacionnan ta tumando lugar pa un festival di buki cu ta duna atencion na welo cu wela di cada mucha. E festival ta habri fin di october.

E aña aki e autor di e serie di buki pa mucha ‘Koen Kampioen’ y ‘James Blond’, sr. Fred Diks a skirbi e buki pa e Festival d buki pa mucha 2016. Esaki a keda traduci na Papiamento. Rudyomar Leysner a ilustra e buki di e festival.

Hopi talento local y di afo ta bini hunto pa trece un otro edicion di e Festival di buki pa mucha. E aña aki tin 2 ilustrador local ta participa na e festval di buki pa mucha, Rudyomar Leysner y Vanessa Paulina. Nan lo bishita diferente scol pa duna presentacion di nan ilustracionnan. Rudyomar su specialisacion den arte ta dibuho. Pa profundisa su mes den arte Rudyomar a studia na Colombia y despues a presenta diferente exposicion na Aruba tanto exposicion solo como exposicion di grupo. Rudyomar a keda selecta pa e comision ‘Hoben y Talentoso’ y e publicacion di dicho comision. Rudyomar a ilustra e buki di festival titula ‘Super wela den coma’.

Vanessa Paulina ta un artista y ilustrador conoci den nos comunidad tambe pa su murals. Vanessa Paulina a studia Fashion design y a specialisa den ilustracion. Tres publicacion di Vanessa Paulina nan ta ‘Tocht over de rivier’, ‘Puppie’s verhaal’ y ‘Wat wordt ik later’. Vanessa a ilustra dos buki di autora Hilli Arduin titula ‘Ik neem je mee’ y ‘A boi koni’. Ademas Vanessa ta conoci pa su serie di cuadra ‘Childhood series’ y ‘Schizophrenia series’ y su ultimo proyecto ‘the Goddesses’. Mas informacion na www.vanessapaulina.com y riba website di biblioteca www.bibliotecanacional.aw. Tambe pa haya sa mas di e otro autornan y ilustrador cu ta participa na e festival.

Lema di e festival ta ‘Opa y Oma, conta mi y inspira mi’. Cu e lema aki ta pone atencion riba e famia, welo cu wela cu por yuda nan nietonan activamente cu lesamento door di lesa pa y cu nan y conta storia.

Apertura di Festival di buki pa mucha ta tuma lugar diabierna atardi dia 28 di october. Scol Prinses Amalia ta encarga cu e presentacion durante apertura. Autornan ta bishita scolnan participante (den siman di 31 di oktober pa dia 4 di november) y den oranan di atardi tin actividad pa mucha na biblioteca caminda tur mucha ta bon bini. Esaki ta di dialuna 31 di oktober pa diahuebs 3 di november. Durante e clausura diabierna 4 di november, cual ta tuma lugar na Sint Dominicus college, e muchanan di St. Dominicus College ta percura pa entrene e publico cu un presentacion special. Un y tur ta bon bini na tur actividad.





Biblioteca Nacional Aruba
George Madurostraat 13
Oranjestad Aruba
Phone +297 582-1580
Fax +297 582-5493
www.bibliotecanacional.aw
info@bibliotecanacional.aw

Branch San Nicolas
Peter Stuyvesantstraat z/n
San Nicolas Aruba
Phone +297 584-5277 /
+297 584-3939
Fax +297 584-5004


Dept. Arubiana/Caribiana
Bachstraat 5
Oranjestad Aruba
Phone +297 582-6924

Facebook   Google+ YouTube Pinterest LinkedIn