Dufi Kock

Dufi Kock a nace na San Nicolas, dia 27 di September 1936 y ta biba na Savaneta. Dufi a termina su estudio basico na Scol Don Bosco na San Nicolas. Despues el a continua na scol avansa y a gradua na Lago Vocational School. Despues el a bay traha den oficina di Light Oils. Na aña 1964 el a ricibi un beca di Lago pa bay studia pa ingeniero kimico na Universidad di Dayton, Ohio na Merca. Di regreso el a bay traha como coordinador di Entrenamento y den e capacidad aki el a duna les pa binti aña largo riba diferente nivel y tambe e tabata un persona clave den tayernan importante. Como miembro nacional y internacional di American Society for Training & Development, e mester a tuma varios curso of seminario tanto local como den exterior. Na Lago mes e mester a tuma hopi curso interno. Tambe el a traha como secretario di Lago Scholarship Foundation pa tres aña. Dufi su servicio na Lago a termina tempo cu Lago a cera na aña 1985.

Na 1997 Dufi a skirbi su prome buki “Guia con pa solicita pa trabao; na aña 2006 Kock a publica 2 buki “Fecha y datonan historico di Aruba” y tambe “Historia di un auto clasico” y Historia di Savaneta. Asina cu su prome buki a sali, Dufi a haya su mes ta dedica hopi tempo pa yuda hoben y hende grandi pa logra haya un trabao; traha relato pa muchanan di scol; yuda algun persona traha nan genealogia, etc. Tambe e ta dedica hopi tempo na investigacion di e historia di Aruba y di Segundo Guera Mundial. Cu esaki e ta haya masha hopi peticion local y internacional pa yuda cu historia of pa facilita potret. E ta miembro di varios organisacion di e Mericanonan cu a traha na Lago.

Sr. Kock ta parti di e ekipo di sambuyado cu a lanta un chapaleta y anker cu e meta pa sirbi como monumento. Un anker a keda entrega na Commandant Hofma di Marinierskazerne pa sirbi como un monument pa di e forma ey recorda e cuater militarnan Hulandes cu a perde nan bida mientras nan tabata desarma un torpedo na Eagle Beach na aña 1942. Pa su trabaonan boluntario, La Reina a condecora Dufi na aña 2006 como Lid in de Orde van Oranje Nassau.

Kock a publican na tur, te awor, 6 buki, esaki ta inclui e dos ultimo cu Kock a publica na juni 2012,

1) Guia Con Pa Solicita Pa Un Trabou
2) Fecha y Datonan Historico di Aruba
3) Historia di Un Auto Clasico
4) Historia di Savaneta
5) E Incidente di e Torpedo na Eagle Beach, Aruba (Na Papiamento y Ingles)
6) E Storia di e Barco di Carga Aleman E.S. Antilla (Na Papiamento y Ingles)





Biblioteca Nacional Aruba
George Madurostraat 13
Oranjestad Aruba
Phone +297 582-1580
Fax +297 582-5493
www.bibliotecanacional.aw
info@bibliotecanacional.aw

Branch San Nicolas
Peter Stuyvesantstraat z/n
San Nicolas Aruba
Phone +297 584-5277 /
+297 584-3939
Fax +297 584-5004


Dept. Arubiana/Caribiana
Bachstraat 5
Oranjestad Aruba
Phone +297 582-6924

Facebook   Google+ YouTube Pinterest LinkedIn