E grito di e shoco

E regalo di siman di buki pa mucha 2014 ta cla. E prome ehemplarnan a yega Aruba.  ‘E grito di e shoco’ ta e titulo di e buki pa tur mucha na Aruba. Subtitulo ta ‘Baila cu biento’. E buki ta skirbi pa Charlotte Doornhein. Ilustrador di e publicacion aki ta Sheila Werleman. Traduccion na Papiamento tabata den man di Mirto y Jenny Laclé. Hopi hende y instancia a duna un man pa yega na e resultado final. ‘E grito di e shoco’ ta na 2 idioma, Hulandes y Papiamento.

Dia 22 di augustus, Jeroen Hoogerwerf (editor),  a entrega e buki pa mucha ‘E grito di e shoco’ oficialmente na directora di biblioteca sra. Astrid Britten, escritora Charlotte Doornhein y traductor Mirto Laclé. Entrega a tuma lugar na Smits Koffiehuis na Amsterdam, Hulanda.

Charlotte Doornhein a nace na Hulanda na Bunnik. Su welonan a introducie den e mundo di storia y literatura Caribense como cu nan a biba na Aruba y Corsou entre 1950 y 1975. Charlotte su mama tambe a biba na Antiyas Hulandes te cu su 18 aña. Na 2006 Charlotte ta bay biba na Corsou cu su famia y su cachonan. Charlotte a bin cu e concepto di e ‘Curaçaose festival de Literaire Tippelzone (pa adulto) y e ‘Literaire Trippelzone’ (pa mucha). Banda di skirbi buki pa mucha e ta miembro di redaccion di Cpost, un revista online hopi colorido pa tur amante di Corsou. E ta miembro di hurado di Poem Express durante e NANA-festival di buki pa mucha anual na Corsou. Na 2011 Charlotte, hunto cu su famia, ta bolbe Hulanda. E ta miembro di Simia Literario (un organisacion di escritornan di Aruba y Corsou na Hulanda) pa tene un relacion estrecho cu e sceno tropical. Bibando 5 aña den Caribe ta influencia su skirbimento. Den su buki ‘Shervison ta deskubrí un tesoro’ (Fundashon pa Planifikashon di Idioma, 2010) un mucha Antiyano ta e caracter principal.

Durante e tayernan cu Mirto Lacle ta duna docentenan na oktober e lo papia riba e buki di siman. Tema di e festival ta ‘Fiesta’ y durante e siman di buki pa mucha lo duna atencion na tur tipo di celebracion cu mucha ta participa aden durante aña. E shoco ta central den e buki aki. E shoco ta un parha hopi special y unico cu ta biba riba nos isla y e ta haya yiu den temporada di fin di aña. E mes un temporada cu nos por scucha y disfruta di musica y canto di Dande, un tradicion tipico di fin di aña.
Den e buki tin QR codes. Por scan e codigo cu un smartphone pa asina wak e videoclipnan.

E buki aki ta un regalo pa e muchanan di Aruba y ta bay tocante un aventura cu 2 mucha ta pasa aden. Ciro y Glenda ta bay pa un paseo cu nan klas y nan ta siña hopi di e naturalesa, medio ambiente y cultura di Aruba. Cerca di e scol di Ciro arceologonan ta cobando den tera. Kico nan ta haci? Y kico e shoco nan ta haci ey? Ciro por salba nan?

Cu compra di un buki pa mucha por ricibi e Regalo di siman di Buki pa Mucha 2014 gratis, tanten cu tin den stock, desde e apertura oficial di e Festival di Buki pa Mucha 2014, na tur libreria cu ta participa na e festival.

Publicacion [De Meern]: Levendig Uitgever, 2014, 55 p. ISBN 9789491740206





Biblioteca Nacional Aruba
George Madurostraat 13
Oranjestad Aruba
Phone +297 582-1580
Fax +297 582-5493
www.bibliotecanacional.aw
info@bibliotecanacional.aw

Branch San Nicolas
Peter Stuyvesantstraat z/n
San Nicolas Aruba
Phone +297 584-5277 /
+297 584-3939
Fax +297 584-5004


Dept. Arubiana/Caribiana
Bachstraat 5
Oranjestad Aruba
Phone +297 582-6924

Facebook   Google+ YouTube Pinterest LinkedIn