Emerita Emerencia: Conta storia ta un placer y pasion pa mi!

Emerita Emerencia ta participa na e festival di buki pa mucha di biblioteca. E ta bishita diferente scol basico na Aruba durante un siman largo pa conta storia den klas. Pa Emerita ta un alegria pa wak mucha den un trans ora nan ta scucha storia. Segun Emerita storianan tin poder pa transforma y hiba un mucha den un mundo fantastico. E festival ta habri diabierna dia 31 di oktober 6or. Den siman di 3 pa 7 di november un grupo di autor, contado di cuenta y ilustrador di diferente pais ta bishita 37 scol basico y 19 scol preparatorio .

Emerita Emerencia, yiu di tera, a biba na Canada pa gran parti di su bida. E ta actriz y autor. Na Toronto, Emerita a traha como docente y tambe como un “artist in education”. El a crea 8 “one woman shows”, na Toronto: Stories my Grandmother told me, Labyrinth to Treasures within, Food for Thought, Spring into Action, Leap into Summer, Fall into Fall, The Festival of Light Stories from around the World y Journey to Forgiveness.

Durante su carera Emerita a duna mas cu 150 show pa aña y a bishita scol, festivalnan, centro di bario, bibliotecanan y teatronan na Canada, Merca, Africa, Boneiro y Corsou. Na mei 2011, Emerita a participa na e Kinderboeken Festival na Surnam cu un obra teatral cu mascarada y marioneta produci pa Muchila Creativo, “Shon Trupial ta Malo”. Emerita ta un docente cu SKOA y un di e artistanan cu Muchila Creativo.

Na 2012, Emerita a dirigi studiantenan di Mariaschool den un adaptacion di Con Mundo a haya su Sabiduria, pa e inauguracion di e Festival di Buki pa Mucha na Biblioteca Nacional Aruba. Na 2013, Emerita a crea dos show nobo, e prome, The Mouse, The Ant and the Antelopes, pa Festival di Buki pa Mucha 2013 y e di dos, Save Yourself Justina, pa Dia Internacional pa Derecho di Mucha, cu a wordo presenta na Biblioteca Nacional Aruba. Na Februari 2015 Emerita ta bay di gira na Canada cu e dos obranan aki. Tur dos e shownan a wordo inspira y presenta na Biblioteca Nacional Aruba.

Tur mucha ta bon bini hunto cu nan mayor na e apertura di e festival di buki otro siman diabierna 6or.





Biblioteca Nacional Aruba
George Madurostraat 13
Oranjestad Aruba
Phone +297 582-1580
Fax +297 582-5493
www.bibliotecanacional.aw
info@bibliotecanacional.aw

Branch San Nicolas
Peter Stuyvesantstraat z/n
San Nicolas Aruba
Phone +297 584-5277 /
+297 584-3939
Fax +297 584-5004


Dept. Arubiana/Caribiana
Bachstraat 5
Oranjestad Aruba
Phone +297 582-6924

Facebook   Google+ YouTube Pinterest LinkedIn