Emerita Emerencia ta trece storia cu ritmo

Pa un siman completo Biblioteca Nacional Aruba ta presenta un Festival di Buki pa Mucha atractivo y diverso. Cu diferente autor y contadornan di cuenta di Aruba, Corsou, Boneiro, Surnam, Suisa y Hulanda, biblioteca ta trece un programa diferente. Muchanan di scol por spera presentacion special di actriz y contador di storia Emerita Emerencia.

Emerita Emerencia, naci na Aruba, a biba na Canada pa mas cu 30 aña. Su mayornan ta di Boneiro y tempo cu e tabata chikito e tabata pasa su vakantie di scol na Boneiro. E tin dushi recuerdonan bunita di Boneiro su naturalesa, trankilidad y bunitesa. Asina el a conta Boy Antoin den un entrevista cu Fuhikubo na 2014. E ta bini di un famia di contadornan di storia y cu talento pa toca instrumento musical. Pues conta storia ta den Emerita su raiz y sanger.

Gran parti di su experencia di trabou el a haya na Canada unda el a studia Teatro. Na Toronto. Emerita a traha como docente y tambe como un “artist in education”. El a crea 8 “one woman shows”, na Toronto: Stories my Grandmother told me, Labyrinth to Treasures within, Food for Thought, Spring into Action, Leap into Summer, Fall into Fall, The Festival of Light Stories from around the World y Journey to Forgiveness.

Cu e shownan aki Emerita a duna mas cu 150 show pa aña y a bishita scol, festivalnan local y internacional, centro di bario, bibliotecanan y teatronan na Canada, Merca, Africa, Boneiro y Corsow durante di un periodo di mas cu 25 aña.

Dia cu Emerita a bolbe Aruba, Emerita a cuminsa traha na un kleuterschool na San Nicolas como docente y despues di 2 aña el a asumi e responsabilidad di Zorgcoordinator.

Na mei 2011, Emerita a participa na e Kinderboeken Festival na Surnam cu e obra teatral cu mascara y marioneta, produci pa Muchila Creativo, ‘Shon Trupial ta Malo’. Emerita ta un docente na SKOA y un di e artistanan di Muchila Creativo.

Na 2012, Emerita a dirigi studiantenan di Maria School den un adaptacion di ‘Con Mundo a haya su Sabiduria’, pa e inauguracion di e Festival di Buki pa Mucha na Biblioteca Nacional Aruba.

Na 2013, Emerita a crea dos show nobo, e prome, The Mouse, The Ant and the Antelopes, pa Festival di Buki pa Mucha 2013 y e di dos, Save Yourself Justina, pa Dia Internacional pa Derecho di Mucha, cu a wordo presenta na Biblioteca Nacional Aruba. Emerita a participa na 2014 durante e Festival di Buki pa Mucha cu e tema di ‘Fiesta’. 

Na Februari 2015 Emerita a bay di gira Canada cu e obra The Mouse, The Ant and the Antelopes cu tawata un exito rotundo. El a wordo invita un bes mas pa un gira na Canada. Tur dos e shownan menciona, a wordo inspira na Aruba y presenta na Biblioteca Nacional Aruba.

Ta un honor y un placer pa ta parti di e bunita festival aki na 2015.  Ki alegria pa wak hobennan den un trance ora nan ta scucha storia. Storianan tin poder pa transforma y hiba bo den un mundo fantastico!.” Asina Emerita ta comenta. Emerita ta sigui traha como un “artist in education” na tres diferente nivel: Scol Preparatorio, Scol Basico y Mavo, un colaboracion entre SKOA y Muchila Creativo. Appertura di e Festival di Buki pa Mucha ta otro siman diabierna.

 





Biblioteca Nacional Aruba
George Madurostraat 13
Oranjestad Aruba
Phone +297 582-1580
Fax +297 582-5493
www.bibliotecanacional.aw
info@bibliotecanacional.aw

Branch San Nicolas
Peter Stuyvesantstraat z/n
San Nicolas Aruba
Phone +297 584-5277 /
+297 584-3939
Fax +297 584-5004


Dept. Arubiana/Caribiana
Bachstraat 5
Oranjestad Aruba
Phone +297 582-6924

Facebook   Google+ YouTube Pinterest LinkedIn