Ernesto Rosenstand, un gran ehempel pa nos

Fundacion Lanta Papiamento ta rindi tributo na su miembro honorario Señor Ernesto Rosenstand, di felis memoria.

Fundacion Lanta Papiamento a keda lansa dia 22 di mei 2009 cu entre otro e siguiente metanan:

  • Mehoracion y desaroyo di e status di idioma Papiamento, tanto nacionalmente como internacionalmente;
  • Ampliacion y profundisacion di conocemento di tur aspecto di Papiamento;
  • Conscientisacion di nos pueblo di e balor di idioma Papiamento pa su propio desaroyo;
  • Desaroyo di un bon maneho y planificacion di idioma na bienestar di tur sector den comunidad, di gobierno y, en especial, di enseñansa.

Dia 22 di mei 2010 Fundacion Lanta Papiamento a celebra su prome aniversario cu un homenahe special na Hubert (Lio) Booi (q.e.p.d.), Digna Laclé-Herrera, Ernesto Rosenstand (q.e.p.d.) y notario Ralph Yarzagaray: e cuater personanan aki a bira miembro honorario di Fundacion Lanta Papiamento, como cu nan vision y trabou tabata cuadra den tur sentido cu e metanan aki di nos fundacion.

Awe, cu pena na nos curason, nos mester tuma despedida di nos miembro honorario Señor Ernesto Rosenstand, un autor hopi productivo y aprecia cu a profila su mes na Papiamento den tur aspecto di literatura.

Ernesto su obranan

Ernesto a skirbi tanto prosa, poesia y teatro como columna periodistico cortico. Ademas e tabatin programa na radio den diferente etapa di su bida. Nos ta menciona algun di su obranan literario:

Prosa: Cuentanan Rubiano (1961), Cuentanan pa un y tur (1965), Tur cos a keda atras (1965), Companashi, Cronica di recuerdonan scondi (2005), E soño di Wawa (2006)

Poesia: Un anhelo sin fin (1982), Hesus, ayera, awe y semper (2009)

Teatro: Bo felisidat ta serka mi (adaptacion di e leyenda medieval di Beatris, 1963), Macuarima (1971), Wa­dirikiri (musical, 1974),  Dushi Benganza (1976), Alameda (1978), Pa nan, por ta nan (1979), Kiko ta di nos? (1982), y Ban plasa pa sa! (1983)

El a lanta Teatro Experimental Arubano na 1979 y diferente di e obranan menciona el a skirbi specialmente pa e grupo aki, hopi biaha hunto cu e actornan den forma di tayer. Ta importante pa menciona cu Ernesto a traha tambe hopi intensivo cu e grupo di teatro infantil Chi-ku-cha.

Shinishi di Olvido ta un coleccion di su trabou literario, publica pa Editorial CHARUBA na 2006.

Ernesto su ultimo obra ta Nos cultura cu a keda lansa na 2014.

Y den diferente antologia tin obra, specialmente poema, di Ernesto Rosenstand:

  • Di Nos, di Pierre Lauffer, 1971
  • Cosecha Arubiano, 1983
  • De navelstreng van mijn taal – Anton Claassen - 1992
  • Pa saka kara, 1998

Durante un temporada basta largo e tabata publica su rubrica di dos pagina Literatura  den Bon Dia Aruba.

Ernesto su balor pa nos idioma Papiamento y su literatura

Fundacion Lanta Papiamento ta enfatisa e hecho cu Ernesto ta hopi importante pa literatura di Aruba na Papiamento. Su obranan teatral cu teatro Experimental Arubano  no solamente tabatin un calidad artistico halto, sino tambe un caracter fuerte di compromiso social. Ta poco hende lo por a keda indiferente pa e situacionnan ilustra y e preguntanan lansa den Ernesto su obranan di e tempo ey. Su obranan ta prueba grandi cu teatro na Aruba tin bida y cu e tin su propio elementonan cu por sigui desaroya.

Semper Ernesto a uza Papiamento den su obranan, loke ta otro aspecto di importancia. Caminda hopi ainda ta pensa cu bo no por haci nada cu Papiamento, Ernesto a proba lo contrario den tur aspecto di literatura. Na 2013 el a publica Refrescando nos Papiamento pa promove bon uzo di Papiamento. Pa su dedicacion na Papiamento Ernesto a ricibi na aña 2001 e prestigioso premio di Papiamento Cadushi di Cristal.

Nos kier  gradici señora Mabel y e yiunan di Señor Ernesto Rosenstand cu nan a dun’e e espacio y e tempo pa e por a ofrece Aruba su talentoso produccion literario.

Nos ta termina cu Ernesto su propio palabranan: “Ainda den lo mas profundo nos tin un speransa cu un dia por fin hende lo por bira hende y stima na luga di odia. Nos no mester perde speransa.” (columna ‘Esun of e otro! No tin termino medio’. Den: Shinishi di Olvido. CHARUBA, 2006:27)

Cu nos amigo Ernesto sosega na paz. Fundacion Lanta Papiamento, Aruba, 11 di augustus 2016





Biblioteca Nacional Aruba
George Madurostraat 13
Oranjestad Aruba
Phone +297 582-1580
Fax +297 582-5493
www.bibliotecanacional.aw
info@bibliotecanacional.aw

Branch San Nicolas
Peter Stuyvesantstraat z/n
San Nicolas Aruba
Phone +297 584-5277 /
+297 584-3939
Fax +297 584-5004


Dept. Arubiana/Caribiana
Bachstraat 5
Oranjestad Aruba
Phone +297 582-6924

Facebook   Google+ YouTube Pinterest LinkedIn