Essays on Balance

Na mei ultimo autor local sr. Richard Frank a publica su prome buki titula ‘Essays on Balance’ y e siman aki sr. Frank a bishita departamento Arubiana pa entrega oficial di un ehemplar na e Coleccion Nacional y pa conta algo di su buki. 

Den ‘Essays on Balance’ e pregunta central ta ‘Pakico mundo ta manera e ta?’ E buki ta consisti di dos parti. Esaki ta un obra, un coleccion di contemplacion den forma narativo cu ta explora y reflecciona riba bida, mundo, e ser humano, naturalesa, energia, tempo, espacio, cambio, universo y e relacion y e balansa entre tur. Den e di dos parti e autor ta expresa contemplacionnan riba naturalesa di hende en relacion cu su e propio ser y tambe como parti di e colectivo, e virtud y vicio, religion, politica, boluntad propio, bon y malo y concepto di Dios. Acercando e ideanan cu un punto di bista riba mundo inovativo. E autor ta splica tanto naturalesa como e ser humano den contexto di un laso eterno mara na e leynan universal di balance. E buki ta skirbi na Ingles. Sr. Frank a entrega e buki na sra. Lourdes Croes, hefe di departamento Arubiana. Pronto lo tin mas ehemplar den circulacion pa miembronan di biblioteca por fia.

Origen di e buki ta den un soño cu e autor a haya tempo cu e tabata un hoben di 14 aña y esaki a haci un impacto grandi riba dje. Asina grandi cu a consecuencia sr. Frank a keda investiga e locual cu el a mira y a scucha den e soño aki y te ainda ta sigui explora loke tin rond y mas aya, loke ta eterno y omnipresente.

Na 1998 sr. Frank a dicidi di pone su pensamentonan riba papel y asina e proceso di skirbi a cuminsa. Y e kico e proceso di skirbi a nifica pa sr. Frank? “E proceso di skirbi a aclarea loke mi ta pensa. Esaki a yudami desaroya e filosofia basico y hink’e den un forma di naracion, mi ta conta storia y alabes e storianan ta forma e base di e estudio cu mi ta haciendo awor aki”. E autor ta comparti su ideanan y ta pidi e lesador pa tene un ‘open mind’. Segun e autor “e secuencia di e essay nan ta logico y constructivo”. Segun sr. Frank “hende ta nace cu tres capacidad pa tin un of otro nivel di emocion, intuition y e capacidad di rasona. Durante cu bo ta crece bo ta desaroya bo mes di tal manera cu bo ta siña controla e tres forsanan/capacidadnan y esey ta forma bo identidad y e proyeccion di bo intencion y boluntad. E balansa entre esakinan ta contribui na bo bienestar. Segun Richard Frank “Continuamente bo ta siña y bo por haya e mihor balansa Esey ta un motivacion. Pero un balans perfecto no ta existi”. “Loke tin semper ta: cambio. Tur cos den bida y mundo ta keda cambia”.

Richard Frank ta admirador di autornan manera John Steinbeck y Hubert Lampo. E mes ta prefera di skirbi na Ingles pero su poemanan ta skirbi na Papiamento. Y e titulo cu e tin pensa pa su coleccion di poesia ta “Loke a conta ayera ta conta awe” pero ainda nan ta den ‘drafts’, kizas algun dia e ta publica su poemanan.

Richard Frank a traha algun luna cu un editor pa corigi y structura e contenido di ‘Essay on Balance’. Esaki riba su mes tabata un proceso cu Richard a siña hopi for di dje. E buki ta dedica na su yiunan.

E publicacion ta un ‘Print on demand’ (POD), esaki kier men cu por scohe cuanto ta laga imprimi. E ta keda entrega den un par di dia. E buki ta obtenibel caba como Ebook via Amazon.com y pronto den libreria na Aruba.

Richard Frank ta ingeniero y tin 15 aña trahando na WEB. Actualmente e ta elaborando riba su filosofianan, purbando di structura nan poco mas. Cu mucho gusto e ta ricibi feedback constructivo di su lesadornan.

 


 

Essays on Balance: There Is Something Out There. It Is Nothing, Yet, It Is Everything. It Is Eternal

By Richard A. Frank

‘Essays on Balance’ is a collection of thirty-three essays that explores possible answers to that one guiding question: Why is the world the way it is? Split into two parts, it explores first the most fundamental questions about the workings of nature—energy, entropy, time, space, change, life, and the universe—and it investigates them in a way that both laypersons and experts will enjoy reading. In the second part, considerations about human nature are explored as they relate to the self, the collective self, virtue and vice, religion, politics, free will, good and evil, and the concept of God. Approaching these considerations from an innovative worldview, it explains both nature and human nature as an indissoluble whole bound by the universal laws of balance.

Language: English. Published in May 2016. POD via www.lulu.com: Paperback, 290 Pages, Prints in 3-5 business days. ISBN 9781483449166

 





Biblioteca Nacional Aruba
George Madurostraat 13
Oranjestad Aruba
Phone +297 582-1580
Fax +297 582-5493
www.bibliotecanacional.aw
info@bibliotecanacional.aw

Branch San Nicolas
Peter Stuyvesantstraat z/n
San Nicolas Aruba
Phone +297 584-5277 /
+297 584-3939
Fax +297 584-5004


Dept. Arubiana/Caribiana
Bachstraat 5
Oranjestad Aruba
Phone +297 582-6924

Facebook   Google+ YouTube Pinterest LinkedIn