Estructuras de estadia temporal

Recientemente e hoben artista, Luis Villegas a entrega 2 copia di su publicacion mas recien na sra. Des Croes di departamento Arubiana/Caribiana di Biblioteca Nacional Aruba. E titulo di e publicacion ta "Estructuras de Estadia Temporal". E publicacion aki ta e resultado final di Villegas su residencia artistico na e ciudad di La Plata den provencia di Buenos Aires, Argentina, cu apoyo di UNOCA.

E publicacion ta trata temanan di identidad personal cual ta captura e esencia di crece riba e isla despues cu mayornan ta dicidi di emigra di nan pais pa establece nan mes na Aruba. Villegas ta describi su publicacion como "un investigacion di derechonan humano pa nacionalidad y estudio unda e gobierno di un pais ta neglisha un parti importante di su poblacion."

Den esaki e ta toca e tema cu, segun Villegas, ta wordo evadi den e discurso publico, esta di "hobennan cu a wordo perhudica door di Departamento di Integracion, Maneho y Admision di Stranheronan (DIMAS) pa por sigui nan estudio na Hulanda of otro paisnan den exterior."

Villegas ta presenta esaki den un contexto di Arte contemporaneo y multidisciplinario, unda cu ilustracion, arte di palabra, fotografia y entrevistanan cu otro hobennan afecta pa e problema cu DIMAS a crea ta bin hunto pa conta e storia di un generacion cu no ta vocifera nan malcontento cu un burocracia indiferente.

E buki ta na benta na Artfama, cual ta situa na fin di caya grandi y Villegas ta encurasha e publico pa pasa na Artfama of Dept. Arubiana unda cu por tira un bista riba su publicacion.

E contribucion voluntario aki di parti di Villegas ta cuadra cu e vision di departamento Arubiana/Caribiana pa un of dos copia di cada publicacion traha na Aruba of cu ta trata di Aruba ta warda y registra den coleccion di Dept. Arubiana, cu e meta pa salvaguardia nos herencia cultural pa tur generacion.





Biblioteca Nacional Aruba
George Madurostraat 13
Oranjestad Aruba
Phone +297 582-1580
Fax +297 582-5493
www.bibliotecanacional.aw
info@bibliotecanacional.aw

Branch San Nicolas
Peter Stuyvesantstraat z/n
San Nicolas Aruba
Phone +297 584-5277 /
+297 584-3939
Fax +297 584-5004


Dept. Arubiana/Caribiana
Bachstraat 5
Oranjestad Aruba
Phone +297 582-6924

Facebook   Google+ YouTube Pinterest LinkedIn