Exposicion Conseho di mucha na biblioteca

Diasabra ultimo Su Alteza Real, Prinses Laurentien como fundador di Raad van kinderen y gobernador di Aruba, sr. Alphonso Boekhoudt, tabata invitadonan special pa e apertura di e exposicion di ‘Kids council’ na biblioteca. Esaki ta un exposicion cu ta duna un bista riba e desaroyonan di Kids council na Aruba. Publico ta bon bini pa pasa wak e exposicion y un invitacion special ta bay pa tur mucha. Esaki ta habri pa un siman durante orario regular di biblioteca na Playa.

Raad van kinderen ta un iniciativa cu a nace na Hulanda y door di su exito a dicidi di introduci esaki na Aruba. Esaki a sosode tres aña pasa. Raad van kinderen ta duna mucha e plataforma pa expresa nan ideanan riba problemanan cu ta existi den comunidad y formula solucion. Esaki conhuntamente cu companianan y negoshi local cu por usa idea nobo y e perspectiva diferente di mucha. Mucha tin ora ta wak cos for di un otro angulo, simpel, sincero y habri. Scolnan na Aruba ta trahando riba e concepto aki y ta satisfecho cu e resultadonan. Docentenan ta haya inspiracion di e creatividad di e mucha. Asina tur partido ta yuda otro.

AHATA ta un di e companianan local cu ta sostene e programa di Kids council Aruba y tin diferente scol basico ta participa. Aruba Tourism Authority ta e prome compania cu a firma pa 3 aña pa Raad van Kinderen. E programa a keda introduci den diferente fase.

Gobernador di Aruba y Su Alteza Real Prinses Laurentien a bishita Biblioteca Nacional Aruba pa di prome biaha. Prinses Laurentien a efectua apertura oficial door di corta sinta.

Un invitacion ta bay na scolnan y negoshinan local pa bishita e exposicion special aki. Esaki ta duna un bista di cuanto cos por haci y kico ta e resultado di e ultimo tres aña. Pa mas informacion di Raad van kinderen por bishita e exposicion na biblioteca of bishita e website www.raadvankinderen.nl Of un clip riba facebook.





Biblioteca Nacional Aruba
George Madurostraat 13
Oranjestad Aruba
Phone +297 582-1580
Fax +297 582-5493
www.bibliotecanacional.aw
info@bibliotecanacional.aw

Branch San Nicolas
Peter Stuyvesantstraat z/n
San Nicolas Aruba
Phone +297 584-5277 /
+297 584-3939
Fax +297 584-5004


Dept. Arubiana/Caribiana
Bachstraat 5
Oranjestad Aruba
Phone +297 582-6924

Facebook   Google+ YouTube Pinterest LinkedIn