Exposicion tocante un gran autor na biblioteca

Den hal di biblioteca na Playa tin un exposicion chikito di e gran autor Colombiano, Gabriel García Márquez, tambe conoci como Gabo. Esaki pa honra Garcia Marquez cu a muri dia 17 di april ultimo. Su fama a yega rond mundo y el a gana diferente premio Literario internacional y prestigioso, entre nan e premio Nobel.

Na biblioteca a honra e autor aki durante un Luna Cultural na 2007. Su talentonan tabata hopi diverso, Gabriel Marquez a skirbi novela, storia cortica, scripto pa film y teatro y e tabata periodista tambe. Gabo (nomber di cariño) ta ser mira como e cara y e exponente mas importante di e genero ‘realismo magico’. Un ehempel di esaki ta ‘Crónica de una muerte anunciada’ (A death foretold).

Gabriel García Márquez a nace dia 6 di maart 1927 na Aracataca, un pueblo situa na e costa di Colombia. E ta yiu homber di Gabriel Eligio García y Luisa Santiaga Márquez Iguarán, yiu muher di e colonel Nicolás Márquez y Tranquilina Iguarán. Gabriel a lanta na cas di su welo te dia su famia a muda pa Riohacha. Na 1936 su welo colonel Nicholas Márquez a muri y esaki tabata e motibo pa Gabriel muda pa Barranquilla pa sigui su estudio. E la sigui enseñansa entremedio na e Colegio San José desde 1940 y a logra obtene su kandidaats den Liceo Nacional den Zipaquirá na 1946. Na 1947 e la muda pa Bogotá pa studia politicologia na e Universidad Nacional de Bogotá pero e no a cabe. Na Bogotá despues di a lesa Kafka's La Metamorfosis, el a realisa su mes cu e kier a bira escritor.

El a muda pa Barranquilla pa dedica su mes na Media y Literatura. El a traha como columnista pa El Heraldo. Riba peticion di Alvaro Mutis, García Márquez na 1954 a bolbe Bogotá caminda el a traha como reportero y reseñador di cine pa El Espectador. Despues di a publica critica riba propaganda di e gobierno Colombiano tocante e sinkmento di un barco di marine na 1955 el a keda staciona na Europa. Despues di su estadia na Europa García Márquez a bolbe Sur-America y a bayi biba na Venezuela. Na 1958 el a bay bek Baranquilla y el a casa cu Mercedes Barcha, cu kende el a haya 2 yiu. E pareha a muda pa Cuba caminda García Márquez a skirbi tocante di e revolucion comunista di Fidel Castro. E amistad cu Fidel Castro a resulta den apertura di un sucursal di Castro su oficina di prensa Prensa Latina na Bogotá.

Na 1961 el a muda pa New York como corresponsal pa Prensa Latina. Pa motibo di menasanan continuo di CIA y refugiadonan Cubano el a muda pa Mexico. Despues su libertad pa drenta Merca te cu 1971 a wordo kita fe dje. Na 1967 el a publica su obra mas admira: Cien años de soledad.

Desde 1975 García Márquez ta biaha entre diferente ciudadnan manera Mexico City, Cartagena, Havana y Paris. Na 1982 el a ricibi e premio Nobel pa Literatura. Na 2002 el a publica su autobiografia Vivir para contarlo. Na fin di 2004 Memoria de mis putas tristes a keda publica, un storia di amor entre un hende homber bieu y un prostituta hoben.

Gabo a muri na Mexico city dia 17 di april na edad di 87 aña. Pos lesa hopi mas di e gran autor riba Internet, biblioteca tin diferente titulo di Gabriel Marquez na diferente idioma cu publico por fia.

http://www.theguardian.com/books/2014/apr/22/gabriel-garcia-marquez-memorial-held

 





Biblioteca Nacional Aruba
George Madurostraat 13
Oranjestad Aruba
Phone +297 582-1580
Fax +297 582-5493
www.bibliotecanacional.aw
info@bibliotecanacional.aw

Branch San Nicolas
Peter Stuyvesantstraat z/n
San Nicolas Aruba
Phone +297 584-5277 /
+297 584-3939
Fax +297 584-5004


Dept. Arubiana/Caribiana
Bachstraat 5
Oranjestad Aruba
Phone +297 582-6924

Facebook   Google+ YouTube Pinterest LinkedIn