Feria di storia y Cuenta di Pasco

                                    Feria di Storia y Cuenta di Pasco

Diasabra, 13 di december benidero, Fundacion Bon Nochi Drumi Dushi ta bolbe organisa su Feria di Storia y Cuenta tan gusta. Esaki lo ta di tres Feria di Storia y Cuenta y alabes e actividad di clausura di aña 2014. Tema di e Feria ta Pasco di Nacemento.

Durante e feria mucha y adulto por disfruta di diferente storia di Pasco. Tin 4 tent cu por bishita y gosa di 4 diferente storia. E tentnan ta dorna den e ambiente di Pasco cu contado bisti segun e tema di e storia. Durante e feria lo inaugura e stage nobo cu presentacion musical y comedia. Tin oportunidad tambe pa saca bunita potret cu diferente figura di e temanan di e storianan di Pasco. Lo tin rifa hopi atractivo, manera weekend stay na hotel, macuto di pasco hopi grandi y hopi mas. Demasiado pa menciona. FBNDD ta invita henter comunidad y specialmente tur mucha pa bishita e tremendo Feria di Storia y Cuenta, riba diasabra 13 di december, di 4.0r pa 7.or p.m riba e bunita plenchi den Oranjestraat, meymey di ex-Interbank y Cedehm.

Clausura di e aña di actividad ta e momento tambe pa directiva reflexiona riba e meta  di e fundacion y vision pa logra esaki. Ta conoci cu Bon Nochi Drumi Dushi ta un proyecto di promocion di lesamento cu enfoke riba e placer cu lesamento ta duna, banda di tur otro beneficio conoci. Es mas, directiva ta mira placer di lesamento como e herment principal pa por yega na e otro beneficionan, manera ampliacion di vocabulario, stimulacion di imaginacion, oido y concentracion, pa menciona algun.

Pa loke ta 2014, por bisa cu sigur a tene cuenta cu e importancia di creatividad, constancia y diversifcacion pa loke ta contenido y ehecucion di e diferente actividadnan. Durante henter aña, banda di nos actividad principal, esta e bishita na cas, a tene un variedad di actividad. Quiz di lesamento ta keda un actividad hopi gusta pa scolnan. Fuera di competencia bou di scolnan basico regular, a tene e prome competencia bou di scolnan basico special, segun planificacion di termino largo. E bustour e aña aki, tabatin como tema, Indjan y cueba. Un grupo combina di mucha di Casa Cuna y mucha cu semper ta participa na actividadnan di FBNDD a bishita e diferente grotnan den un bus cortesia di Fofoti Tours, pa scucha storia y haci otro actividad rond di e storia. A tene anochi di informacion tocante e importancia di lesamento pa mucha pa lider di creche, tanto pabou como pariba di brug. Alabes a entrega buki pa cortesia di autora Alida Kock na tur creche presente. Despues cu na 2013 FBNDD riba invitacion di Fundacion Lesa ta Dushi a presenta e proyecto na Boneiro, e aña aki a duna tayer na e boluntarionan di e fundacion pa nan por a cuminsa cu bishita na cas segun e concepto di BNDD. Autora Evelien van Dort, cu a bishita Aruba pa siman di buki, a duna un tayer na directiva y un grupo di 10 boluntario, tocante con pa yuda mucha pega soño y drumi un soño completo y trankil. Den e planificacion pa termino largo directiva a incorpora tambe, contamento di storia un biaha pa luna riba diasabra mainta den oficina di e funadacion. E prome contamento a tuma luga na november, cu bishita di Grupo Scout Casibari. Tabata un experiencia hopi dushi, tanto pa e muchanan como e bolunatrionan.

Den 2014 FBNDD a haya hopi peticion pa conta storia, sea na creche of fiesta di hacimento di aña, durante actividadnan di diferente organizacion cu ta traha na bienestar di mucha. Por ehempel na e cena di Pasco pa e muchanan di Imeldahof, cu a tuma luga na Peanuts Restaurant.

Tur esaki no por tabata posibel sin e dedicacion y perseverancia di e grupo grandi di boluntario cu ta yuda cu e diferente actividadnan.

Fuera di esey FBNDD por considera su mes un organisacion hopi bendiciona, cu por conta henter aña cu un grupo fiel di sponsor, cu lo haya su atencion na un manera special.

FBNDD ta reconoce e balor grandi di prensa pa por logra su meta y ta gradici prensa pa su aporte y sosten.

Atentamente. Olga Buckley, Presidente FBNDD

 

 

 

 





Biblioteca Nacional Aruba
George Madurostraat 13
Oranjestad Aruba
Phone +297 582-1580
Fax +297 582-5493
www.bibliotecanacional.aw
info@bibliotecanacional.aw

Branch San Nicolas
Peter Stuyvesantstraat z/n
San Nicolas Aruba
Phone +297 584-5277 /
+297 584-3939
Fax +297 584-5004


Dept. Arubiana/Caribiana
Bachstraat 5
Oranjestad Aruba
Phone +297 582-6924

Facebook   Google+ YouTube Pinterest LinkedIn