Festival di buki pa mucha 2012

Festival di buki pa mucha 2012

Nos mundo ta draai y ami ta sigui lesa bay
Festival di buki pa mucha na november

E preparacionnan pa e festival di buki pa mucha a cuminsa. Esaki ta planea pa tuma lugar den e siman di 2 di November pa 9 di November 2012.

Cada aña ta scohe un tema diferente y un grupo di autor y ilustrador di buki pa mucha for di Aruba Antiyas y Hulanda. E tema di e aña 2012 ta “ Multiculturalidad” y e lema ta: ‘Nos mundo ta draai y ami ta sigui lesa bay’. Esaki ta e di 20 festival cu biblioteca ta presenta caminda ta bishita mas of menos sesenta scol riba nos isla. Biblioteca ta organisa e festival grandi aki pa stimula mucha pa lesa y pa stimula combersacion y interes pa autor di buki pa mucha como tambe ilustrador y artista. Pa medio di e bishitanan na scol e mundo tras di e buki ta yega mas cerca di e mucha. Mucha por combersa mas directo cu e escritor di e buki cu el a lesa.

Workshops pa maestro
Biblioteca ta purba di stimula participacion di scolnan pa medio di workshops pa maestronan. Ta duna nan introduccion entre otro di e tema y e autornan y ta duna tips y conseho kico pa hasi cu nan grupo pa asina prepara pa e bishita di un autor. E workshopnan ta cuminsa di 24 pa 27 di september. Dialuna 24 y diamars 25 di september n San Nicolas (IPA). Diaranson 26 y diahuebs 27 di september na O’stad (BNA)

Carino di siman
Tur aña un autor y ilustrador ta traha riba un publicacion special pa e festival. E aña aki Sr. Dolfi Kock ta na turno pa hasi esaki hunto cu ilustradora sra. Ria Arrindell. Ta haya e buki aki gratis cu compra di buki na libreria durante e apertura di festival y despues na tur librerianan participante te ora e stock caba . E titulo di e publicacion nobo cu biblioteca ta spera ta ‘Bon mucha???...Tur dia!’
Dolfi Kock (1941) a publica “E gulido golos”, su prome buki na 2004. Banda di storia pa mucha, Dolfi Kock ta skirbi poesia tambe. Ria Arrindell a yega di ilustra mas buki pa mucha, titulo di e bukinan ta ‘Priki prikichi y princes’, ‘Djente Chikitin ta bay keiro’. ‘Magy Maripampun’ y ‘Tres storia Rubiano’. Tanto Kock como Arrindell tin hopi aña di experencia trahando den enseñansa na Aruba. (Potret)

Cantica di festival
Composicion di e cantica di festival ta Sr. Robert Reeberg. Areglo: Sr. Uranis Boekhoudt.
Tur aña tin un cantica di festival y e aña aki lo compila tur e 20 canticanan di e añanan anterior y e CD lo ta obtenibel durante e apertura dia 2 di november 2012

Autornan y ilustrador
Diferente autor y ilustrador di Aruba, Corsou, Bonaire, Sint Maarten,Hulanda, Jamaica y Surman a ricibi un invitacion di biblioteca pa participa na e festival anual.
Por spera presentacion di:
Hulanda: Mylo Freeman, Tjibbe Veldkamp, Evelien van Dort y Sjoerd Kuyper. Corsou: Tio Ali (Alvin Inecia), Roland Colastica. Boneiro: Tio Gabi(Gabriel Mercera), Kathleen Thielman. St.Maarten : Loeki Morales, Surnam : Hilli Arduin, Jamaica : Amina Blackwood Meeks, Aruba: Robert Reeberg, Olga Buckley, Desiree Correa, Mariebelle Arends, Dolfi Kock, Dora Lauffer-Mathilda, Noris van Lis-Donata, Olga Orman

Den proximo simannan biblioteca lo publica mas informacion di e autornan aki riba su website y riba FaceBook. Y lo distribui informacion pa e scolnan participante. E ana aki ta dedica e festival na Sr. Ruud Bosch como tambe e buki.

Financiamento
Un gran parti di e gastonan pa e festival ta wordo cubri dor di biblioteca. . Tur aña biblioteca ta spera di por haya sosten di sponsors cu ta mira e importancia di sostene e meta di stimula mucha pa lesa, entre otro di e librerianan aki na Aruba, aerolineanan y sponsornan fiel di tur aña.

Boluntario
Autornan ta bishita scolnan acompaña pa un empleado di biblioteca of sea un boluntario. Personanan interesa pa ta boluntario durante e siman di festival por tuma contacto cu Yosmar Sneek na 5821580 / 5821540

Apertura y clausura
Biblioteca Nacional Aruba ta laga fiesta di apertura pa un parti den man di un scol preparatorio of basico y librerianan local. Publico por spera un bunita presentacion di Maria School pa e apertura como tambe presentacion di e autornan participante.
Clausura di e festival ta den man di Scol preparatorio Arco Iris e aña aki. Muchanan lo percura pa un bunita presentacion riba stage dilanti biblioteca. E diferente libreria ta pone nan coleccion di buki pa mucha na benta bou tent riba caya dilanti biblioteca. Un y tur ta bon bini.

 
 
 





Biblioteca Nacional Aruba
George Madurostraat 13
Oranjestad Aruba
Phone +297 582-1580
Fax +297 582-5493
www.bibliotecanacional.aw
info@bibliotecanacional.aw

Branch San Nicolas
Peter Stuyvesantstraat z/n
San Nicolas Aruba
Phone +297 584-5277 /
+297 584-3939
Fax +297 584-5004


Dept. Arubiana/Caribiana
Bachstraat 5
Oranjestad Aruba
Phone +297 582-6924

Facebook   Google+ YouTube Pinterest LinkedIn