Fiesta cu buki

Fiesta cu buki

‘Hiep Hiep Hoera, di fiesta cu buki!’, ta e lema di e Festival di Buki pa Mucha 2014. Biblioteca Nacional Aruba ta organisa e Festival di Buki pa Mucha pa promociona lesamento. Ta busca tur forma y medio pa haci lesamento mas agradabel y atractivo pa cada mucha. Pa medio di contamento di storia, presentacion y diferente actividad cu autor y ilustrador ta purba di lanta e interes pa e mundo di buki. Lesamento ta algo esencial pa e desaroyo di un mucha.

Pa un siman largo e autornan invita pa e festival ta bishita scolnan y ta presenta nan mes y nan bukinan. Tambe tin un programa parti merdia na biblioteca di Oranjestad y sucursal na San Nicolas. E autornan ta bin di tur parti di Caribe Hulandes, Surnam y Hulanda. Nan ta: Charlotte Doornhein, Irene Heim y Evellien van Dort di Hulanda. Cathleen Giterson y Alvin Inecia (Tio Ali) di Corsou, Gabriel Mercera di Boneiro, Tricia Chammaa di Saba, Indra Hu-Ramdas di Surnam. Di Aruba ta participa Gino vrolijk, Emerita Emerencia, Astrid Gietel, Sheila Werleman y Liliana Braamskamp-Erasmus. Bishita na scolnan ta di 2 pa 7 di november.

E tayer pa maestronan di scol basico y preparatorio, ta tuma lugar dia 22, 23, 24 y 25 di september 2014 na biblioteca na Playa pa asina nan cera conoci cu e tema di e Festival, pa duna nan idea y material cu por usa na scol.

Biblioteca ta organisa un competencia di skirbimento, ta invita mucha pa skirbi un cuenta cu tin di haber cu e tema di e festival di e aña aki, cu ta ‘FIESTA’. E competencia ta pa muchanan entre 8 pa 12 aña di edad. Esaki lo pone e muchanan sinti curiosidad pa sa mas tocante e autornan cu ta bishita nos isla. Den e Actividad di Atardi di tur diahuebs di 3 pa 4or di atardi lo duna nan guia y tips di autornan Arubiano, pa asina nan por skirbi cu mas sabiduria tocante e tema.  

Eveline van Dort, autora di buki pa mucha ta duna un charla di Dyslexia den e mesun siman aki. Biblioteca Nacional di Aruba ta yama un y tur bon bini na e apertura di e Festival di Buki pa Mucha, dia 31 di oktober 2014, di 6 or pa 8 di anochi, dilanti di e edificio di biblioteca na Playa. Apertura di e festival di buki pa mucha ta den man di Colegio Sagrado Curason y Colegio Laura Wernet-Paskel na Sta Cruz ta percura pa un bunita clausura di e festival. Por sigui tur noticia di e festival riba website di biblioteca ww.bibliotecanacional.aw.

 

 





Biblioteca Nacional Aruba
George Madurostraat 13
Oranjestad Aruba
Phone +297 582-1580
Fax +297 582-5493
www.bibliotecanacional.aw
info@bibliotecanacional.aw

Branch San Nicolas
Peter Stuyvesantstraat z/n
San Nicolas Aruba
Phone +297 584-5277 /
+297 584-3939
Fax +297 584-5004


Dept. Arubiana/Caribiana
Bachstraat 5
Oranjestad Aruba
Phone +297 582-6924

Facebook   Google+ YouTube Pinterest LinkedIn