Gina Henriquez

Biblioteca Nacional Aruba tin den su coleccion un obra di poesia titula ‘Triminti’ di Sra. Gina Henriquez (seudonimo pa Swinda Henriquez ). Sra. Gina Henriquez, autora y pintora, naci na Aruba, a studia idioma y a skirbi ensayo, storia y cuentanan cortico. Sra. Gina Henriquez a traha hopi tempo cu sr. J. Beaujon na Cas di Cultura como boluntario. Tambe el a biba hopi aña na Corsou.

Obranan di su man a keda publica den ‘Brindis’. ‘Amistad’, ‘Taray’ y ‘Cosecha Arubano’. E buki ‘Triminti’ ta un seleccion di poema skirbi na Papiamento masha bunita mes. 

Sra. Gina Henriquez ta skirbi den e buki aki: “ Masha hobencita (14 aña) mi a tribi skirbi un poema na ocasion di un fiesta pa mi maestra di Ingles. Despues di e hazaña agradabel aki a sigui tur e otronan. E titulo ‘Triminti’, ta relaciona cu e osadia di e tuna cu ta ilustra portada di e buki.

E tuna cu ta invadi e teritorio priva di e cas. Tambe e ta relaciona cu e curashi pa bisa cu frankesa loke mi ta pensa y sinti. Ta manera un mucha tribi, cu pa fastioso ta haci co’i triminti….”.

Den ‘Cosecha Arubiano’(19..), e capitulo ‘Arubaanse literatuur in vogelvlucht’ autornan ta skirbi: “Van Gina Henriquez (1937) weten we dat ze relatief veel poëzie geschreven heeft, maar nooit gepubliceerd.” Pues, un poeta poco desconoci.

Cu permiso di Gina Henriquez nos ta publica ‘Pakico’ akinan pa duna boso un impresion. E buki ta acesibel pa publico na biblioteca pa lesa of fia.

Pakico

Pakico ora mi mira bo
di pronto tur pasado ta
rebiba
Pakico ta soñando so
mi por stima bo
Y tin bo amor pa mi caricia
Pakico, pakico…
Nos no por lubida
cosnan cu ya no por
ser realisa
pakico, pakico…

Na biblioteca nos a haya sa cu sra. Henriquez ta masha activo ainda y ta bishita biblioteca regular pa por skirbi trankil den sala di estudio. Sra. Henriquez ta skirbi, pinta, shop of keiro cu amiga, bay come of bay bebe un koffie, ta disfruta di bida, ta namora den bes en cuando y ta cera amistad. …

Cequera

Den mi bida
yen di nochi
mi sa sinti Bo
serca mi
Mi a siña conoce Bo
Y m’a realiza
Con grandi Bo ta

Mi Mama

Y b’a keda keto
Keto keto b’a pasa bai
Cu bo sandalia di catuna
Bo n’ bisa nada
Ya bo n’ta papia por nada
Bo wowonan bunita a bira di glas
Bo mannan di alabaster ta asina friu
Mi sa cu bo n’ ta sufri mas
Pero con mi mester soporta
Mirando bo drumi asina straño
Sabiendo co bo n’ por spierta mas…

Infansia na Mon Plaisir

A combersa un poco cu sra. Henriquez, pa conoce un poco mas mihor. Ken ta e poeta? Ken ta e persona cu a publica ‘Triminti’?

Sra Henriquez ta conta cu……tempo cu e tabata chikito e tabata un mucha muher poco malcria, un ‘troetelkind’ di tur dos wela, bandi mama y bandi tata. Tur sorto di regalo e tabata haya for di nan. E ta hari cu smaak ora cu e ta ‘confesa’ esaki. “E regalo mas bunita cu mi a yega di haya ta un renchi orea cu ruby, for di mi wela. Ainda mi tin’e”.

“Mi tata tabata un tipo ‘corecto’, straight y honesto, bo tin cu bise e cos manera e ta. Mi tabata stime hopi, un bon tata. Nos tabata 4 ruman y ami ta mayor.

Mi a lanta den e bario di Mon Plaisir cu tabata ful otro compara cu awor. Mon Plaisir tabata un mondi grandi anto den dje tabata pasa un rooi. Muchanan por a landa y hunga den e rooi. Un di e barionan mas bieu. Sra. Henriquez ta corda e ambiente di antes bon y ainda ‘nan’ cas tey, den loke nos conoce awor como Maria Christina straat. Un Aruba cu den bes en cuando un barco ta pasa pa trece cargo. Tur e casnan tabata di palo of lodo cu piedra, no tabatin cas di bloki ainda. Poco hende tabata biba aki, nan tabata biba simpel, algun piscado, no tabatin coriente….hendenan ta cushina cu palo cu kerosin……anochi e hendenan ta conta otro storia…..” Esaki ta e scenario di sra. Henriquez su infansia. Despues cu e refineria a bin Aruba, cos a bira poco poco mas moderno. Sra. Henriquez su weganan favorito tabata bula cabuya, e tabata gusta algun di e weganan cu mucha homber ta hunga, hunga bala, hunga kiniki y su hobbynan tabata spaar stampia y pinta. Ainda e ta pinta. E cuadra cu ta riba portada di ‘Triminti’, sra. Henriquez mes a pinte. E ta corda e custumbernan di antes, custumber di bishita, traha y come boyo cu hacimento di aña, antes tabata traha e boyo di mainshi. Invitacion pa fiesta tabata bay cu carta y personal.

Famia

Sra Henriquez a casa cu 22 aña, “un mucha bunita flaco” manera e mes ta bisa den joke y tin casi 80 aña awor, e ta viuda, y e tin dos yiu, Aldo y Gina Paula. Y ainda e ta bunita, delega y tin su ‘sense of humour’.

Personalidad

Con sra. Henriquez ta describi un caracteristica di su personalidad? “Mi no ta gusta mentira, no bin gaña mi, mi no ta gusta. Mi ta aprecia honestidad. Mi ta hende poco reserva, mi ta balora relacion honesto y amistad sincero. Mi no gusta papiamento riba otro, redu…. “. “E ta mas facil pa ta honesto, si mi gaña, kizas mi por lubida kico mi a gaña…”

No ta importa mi, ki posicion e hende tin, cua color nan tin, mi ta bay pa e hende, su sinceridad, esey ta mas importante. Esey mi a siña mi yiunan tambe, ni maske con malo e cos ta cu a pasa, djis conta mi, pa mi sa kico mi tin cu haci.”

Soño y inspiracion

Kico a haci un impresion profundo den sra. Henriquez su bida? Haya su prome yiu. “Wak’e nace, e milager………” Y cua sua soño a keda realisa? “Varios soño. Wak mi 2 yiu crece bira grandi, pa despues nan por a bay studia y cu nan ta bon. Cu nos ta stima otro hopi.” Y ademas “Traha mi cas, biba dushi den mi cas.”

Kico of ken ta un fuente di inspiracion? “Cosnan cu a impacta mi, emocionalmente. Mi ta skirbi hopi pero mi no ta publica”.

Silencio y solitude ta sirbi pa algo? “Sigur no. Ami ta gusta. Ora mi ta mi so hopi biaha mi ta skirbi. Mi ta skirbi na diferente idioma pa expresa mi mes”.

“Mi ta sinti mi comodo den mi mundo di mi pensamentonan. Tin ora mas cu den Papiamento, bo tin cu wak kico bo ta papia y cu kende. Den mi storia ‘Chobil y su amigunan Rubiano’ cu a keda publica den Cosecha Arubiano mi a purba skirbi di e diferencianan den cultura y hende”.

“Loke ta keda dificil pa haya ta e contacto cu publico y feedback for di lesador of critica constructivo con pa ‘polish’ bo skirbimento”.

Mi ta keda skirbi, mi ta gusta skirbi masha hopi mes…….

 

 





Biblioteca Nacional Aruba
George Madurostraat 13
Oranjestad Aruba
Phone +297 582-1580
Fax +297 582-5493
www.bibliotecanacional.aw
info@bibliotecanacional.aw

Branch San Nicolas
Peter Stuyvesantstraat z/n
San Nicolas Aruba
Phone +297 584-5277 /
+297 584-3939
Fax +297 584-5004


Dept. Arubiana/Caribiana
Bachstraat 5
Oranjestad Aruba
Phone +297 582-6924

Facebook   Google+ YouTube Pinterest LinkedIn