Gino Vrolijk

Gino Vrolijk a nace dia 4 di oktober na aña 1973. E fecha aki hopi hende no ta lubida, pasobra nos ta celebra Dia di Bestia. Kizas ta pesey Gino Vrolijk ta gusta bestia, specialmente pushi.
Su nomber di cariño ta Gino. En realidad e tin 7 nomber, mescos cu su ruman homber George. E nomber oficial di Gino ta: Georgino Mathias Ramon François Frederick Henry y Bethony. Un pa cada dia di siman.

Gino Vrolijk y Munye Oduber-WinklaarGino Vrolijk tin un yiu muher. Su nomber ta Amy. E ta un mucha hopi lief. E ta sinti su mes goza cu su tata ta meneer di scol y cu e ta traha cu hopi mucha.
E scolnan cu Gino Vrolijk a bay ta Graf von Zinzendorf Kleuterschool, Prinses Irene School, John Wesley College y Colegio Arubano. El a studia na Instituto Pedagogico Arubano y a termina su estudio na aña 1999 como e prome meneer di kleuterschool den historia di enseñansa di Aruba.

Gino Vrolijk a cuminsa traha na Colegio Hilario Angela. Di tempo ey semper su deseo tawata pa a bay traha den e seccion di Departamento di Enseñansa, esta Desaroyo di Curiculo. Y despues di 4 aña trahando den 1ste klas su deseo a keda cumpli.
Gino Vrolijk a traha 4 aña na Desaroyo di Curiculo. Aki el a haci diferente trabou den cuadro di innovacion di enseñansa primario. Por ehempel traha les pa scol y duna presentacion na e maestronan di scol encuanto e importancia di e idioma Papiamento den enseñansa.
Actualmente Gino Vrolijk ta cabesante di Fontein Kleuterschool na San Nicolas. Marcando historia un bes mas, como e prome meneer cabesante di un kleuterschool den e historia di enseñansa di Aruba.

“Sumpi, e wanglo sabi” (2007) ta e prome buki cu Gino Vrolijk a skirbi. E idea pa e storia ta bini ora e ta corda riba con e tawata hunga y pasa tempo den e cunucu di su welo. Locual e no por lubida ta e cantidad di bes cu el a trapa riba wanglo. Ay! E tawata grita cada bes.
Tempo Gino Vrolijk tawata chikito, tur anochi su wela y su mama tawata cont’e un storia prome cu e bay drumi. Y di aki su interes pa lesamento y buki a cuminsa. Pa Gino Vrolijk conta y/of lesa buki pa muchanan ta masha importante pasobra ta di e forma aki lesamento ta cuminsa.





Biblioteca Nacional Aruba
George Madurostraat 13
Oranjestad Aruba
Phone +297 582-1580
Fax +297 582-5493
www.bibliotecanacional.aw
info@bibliotecanacional.aw

Branch San Nicolas
Peter Stuyvesantstraat z/n
San Nicolas Aruba
Phone +297 584-5277 /
+297 584-3939
Fax +297 584-5004


Dept. Arubiana/Caribiana
Bachstraat 5
Oranjestad Aruba
Phone +297 582-6924

Facebook   Google+ YouTube Pinterest LinkedIn