Gino Vrolijk

Gino Vrolijk a nace dia 4 di oktober na aña 1973. E fecha aki hopi hende no ta lubida, pasobra e ta e dia cu nos ta celebra Dia di Bestia. Bo por rey cua ta e bestia peferi di Gino Vrolijk? Miauw!

Su nomber di cariño ta Gino, pero su nomber oficial ta consisti di 7 nomber, un pa cada dia di siman: Georgino, Mathias, Ramon, François, Frederick, Henry y Bethony. Pret no?

E scolnan cu Gino a bay ta Graf von Zinzendorf Kleuterschool, Prinses Irene School, John Wesley College y Colegio Arubano. El a studia na Instituto Pedagogico Arubano y a termina su estudio na aña 1999. E ta e prome meneer pa a specialisa pa cu e edad di mucha di 4 pa 8 aña. Y di e forma aki a bira e prome meneer di scol preparatorio den e historia di enseñansa di Aruba.

Gino Vrolijk a cuminsa traha na Colegio Hilario Angela Basisschool na San Nicolas, e disctricto na unda el a lanta como mucha. Despues di 4 aña trahando den 1ste klas el a traha 4 aña na Departamento di Enseñansa, esta Desaroyo di Curiculo. Eynan el a haci diferente trabou den cuadro di innovacion pa cu enseñansa primario. Por ehempel traha les pa scol y duna presentacion na maestronan di scol riba e importancia di nos idioma Papiamento den enseñansa. Actualmente Gino Vrolijk ta director di Fontein Kleuterschool na Weg Fontein San Nicolas desde 2008. Marcando historia un bes mas, como e prome meneer cabesante di un scol preparatorio den e historia di enseñansa di Aruba.

‘Sumpi e wanglo sabi!’ ta e prome buki cu Gino Vrolijk a skirbi. E idea pa e storia ta bini ora e ta corda riba con e tawata hunga y pasa tempo den e cunucu di su welo Don Ramon Vrolijk. Locual e no por lubida ta e cantidad di bes cu el a trapa riba wanglo. Ay! E tawata grita cada bes. Abo a yega di trapa riba un wanglo? El a haci dolor?

‘Na caminda pa e fiesta grandi/Op weg naar het grote feest’ ta su di dos buki y ta un honor grandi p’e cu el a haya e oportunidad pa skirbi e “Regalo di Siman di Buki” pa e Festival di Buki di Mucha di Aruba pa aña 2013.

Gino su deportenan preferi ta core skateboard. Su wega preferi ta hunga Playstation y carta. Su hobby ta snorkel y hiking.

Gili ta e yiu di mas chikito di Gino Vrolijk . Gili ta gusta su welo y wela paso nan ta gusta pasa tempo cune y conte soria tanto via buki y internet. Su Opa yama Matty Vrolijk y su Oma Frida Vrolijk-van der Wall Arneman. Y e storia cu Gili ta gusta mas y cu cada bes e ta pidi su welo y wela conta pe ta ‘Roodkapje’.  

Tempo Gino tawata chikito, su wela y su mama tawata cont’e un storia tur anochi prome cu e bay drumi. Esta dushi no? Y di aki su interes pa lesamento y buki a cuminsa. Pa Gino Vrolijk conta y/of lesa buki pa muchanan ta masha importante pasobra ta di e forma aki interes pa lesamento ta cuminsa.





Biblioteca Nacional Aruba
George Madurostraat 13
Oranjestad Aruba
Phone +297 582-1580
Fax +297 582-5493
www.bibliotecanacional.aw
info@bibliotecanacional.aw

Branch San Nicolas
Peter Stuyvesantstraat z/n
San Nicolas Aruba
Phone +297 584-5277 /
+297 584-3939
Fax +297 584-5004


Dept. Arubiana/Caribiana
Bachstraat 5
Oranjestad Aruba
Phone +297 582-6924

Facebook   Google+ YouTube Pinterest LinkedIn