Giolina Henriquez

“HALA DI BERDAD       -  WINGS OF TRUTH”

un preludio pa e neofito            a prelude to the neophyte

    Un compilacion di creacion di e artista Arubiano

                                      Giolina

Joyce L. Pereira

 

Giolina, pintor y poeta

Recientemente a sali riba mercado un debut masha interesante. Ta trata di e obra Hala di berdad, un preludio pa e neofito – Wings of truth, a prelude to the neophyte di e artista Arubiano Giolina Henriquez. “Hala di berdad” ta un combinacion di arte visual y arte di palabra.

Na aña 1996 Giolina a tene un exposicion di su pinturanan “Wings of truth”, na Cas di Cultura. E guia cu potret di e obranan y algun poema cu el a traha pa e exposicion tabatin asina tanto exito, cu e idea a lanta pa sigui traha riba dje, complet’e y e resultado ta e buki cu nos tin nos dilanti awe.

 

“Wings of truth” no tabata e prome exposicion di Giolina, pero si e prome exposicion di su obranan so. Giolina a inmortalisa e exposicion ey pa medio di e publicacion Hala di berdad, un preludio pa e neofito – Wings of truth, a prelude to the neophyte. Un publicacion rico, cu reproduccion di 29 pintura compaña pa 24 poema, tur tanto na Papiamento, como na Ingles.

E subtitulo “un preludio pa e neofito” ta referi na e hecho cu esaki ta su prome salida oficial cu poesia; pues cu e palabranan aki Giolina ta declara, cu riba  tereno di poesia, literatura, e ta un debutante.

Wim Rutgers, e conocido literador, a encarga su mes cu e prefacio “Espiritu di un artista den buelo sin fin”, den cua e ta duna un bon splicacion cu ta yuda bo compronde e obra.

Pa esnan interesa ta bon pa menciona cu den ÑAPA di 7 di October 2000 Wim Rutgers y Nel Casimiri ta elabora mas riba e obra aki den nan reseña.

Giolina mes tambe ta introduci su publicacion. E siguiente palabranan e ta usa como titulo di su introduccion:

E refleho di lama ta provoca mi arte.

Mi arte ta refleha e cultura cu mi ta mira.

Un nacion idiosincratico pa keda.

E ta splica bon cla con e ta mira bida, con e ta mira berdad y con e ideanan aki ta refleha den su obra.

Prome cos cu ta hala atencion, ta e forma acaba di “Hala di berdad – Wings of truth”. Tin hopi tempo y dedicacion hinca den e obra aki, di e portada te e ultimo pagina. No a lubida ningun detaye. Un bunita buki.

Pa e publicacion aki Giolina a haya sosten financiero di Prins Bernard Fonds, Artimo Foundation, UNOCA y ABN AMRO Bank.

 

Busca berdad, mira berdad, papia berdad

E buki ta habri cu e lema: Busca berdad. Mira berdad. Papia berdad.

E lema aki ta confirmacion di titulo y contenido di e buki. Por bisa cu e lema aki ta base di bida y trabao di Giolina.

Durante e entrevista cu mi tabatin cu Giolina, el a profila su mes como un persona cu no ta satisfecho cu kico cu ta, un persona cu un caracter fuerte cu ta prepara su mes bon, cu sa kico e kier. Un hende cu ta busca e berdad y cu ta spera di otro cu nan ta haci mescos.

“Mi no por wanta hende cu no kier mira e berdad. Bo no por compronde bo bida, si bo no por mira e berdad. Mi ta purba bisa e berdad via mi arte, no solamente via mi arte skirbi, sino tambe via mi arte visual. Semper mi arte lo tin un mensahe den dje.

Mi mester bisa si, cu e berdad ta relativo: e berdad cu ta hecho ta obhetivo, e berdad cu ta sintimento ta subhetivo.

Esey ta algo dualistico, cu mi tin den mi mes tambe; pesey bo ta haya banda di pintura tambe poesia, banda di arte tambe ciencia.”

Giolina su ideanan pa loke ta su trabao ta hopi explicito: su arte ta algo propio cu no tin ningun conexion cu loke ta na moda, ni cu ningun proyecto andando, su arte no ta imitacion.

“Mi ta yama mi mes purista: purista tanto den mi skirbimento, como den mi pinturanan. Cu esey mi kier men, cu e unico cos cu ta importante pa mi den mi trabao ta ‘the act of doing it’ . E unico meta cu mi tin, ta expresa un sintimento di mi.”

Dualismo

No ta un casualidad cu Giolina a desoroya su mes como poeta tambe. E por  formula su ideanan hopi bon, cu palabra bon scohi y cla; e ta un pensado cu ta busca pa sa mas y pa compronde bida y su mes miho.

“Instintivamente mi ta expresa cosnan cu ta molestia mi den e ser humano.

Hopi biaha mi ta inspira pa sufrimento. Mi ta glorifica e dolor ey y crea algo cu ta haci mi contento, un buniteza visual pa compensa e dolor.

Esey ta un ehempel mas di e dualismo cu mi tin den mi. Pesey mi ta pinta y skirbi. Y nan dos ta uni den e buki aki.

E mesun dualismo ey bo ta mira tambe den e hecho, cu banda di mi arte mi ta dedica hopi tempo tambe na ciencia. E combinacion di arte y ciencia ta bida pa mi. Den tur dos mi ta mira un sorto di concientisacion, un manera pa usa bo celebro, ‘a way of thinking’. Nan ta complementa otro: di paden e ta sali, di pafo e ta bay paden.Ta un kestion di duna y tuma.

Ademas ta asina, cu bo mester educa bo mes. Pa bo ta critico, bo mester averigua, investiga. No guli manda abao.

Ta importante pa no tin limitacion. Dicon? Pasobra den bida bo no tin control riba tur cos. Den arte si. Arte ta e unico cos den bida cu abo como creador por controla. E libertad den arte ta hopi importante. Pesey tambe bo mester ta hopi cauteloso, ora bo tin cu dicidi na unda bo ta hiba bo arte.”

 

Hala di berdad

“E titulo “Hala di berdad – Wings of truth” ta nifica pa mi e buelo den bo alma caminda bo ta haya bo mesun berdad. Esey ta e sintimento cu mi tin, ora mi ta traha: mi ta drenta totalmente den mi propio ser, lubida tur cos.

Despues, ora mi ta cla cu e trabao, mi mes ta keda asombra ora mi haya mi 

confronta cu un realidad cu tabata den mi subconciencia.”

Loke Giolina ta bisa aki, ta conta pa tur dos forma di arte cu e ta practica.

Nos ta duna un ehempel. Mira e poema “E secreto” y e pintura “E secreto” cu nos a reproduci riba e pagina aki.

En berdad, pintura y poema ta complementa otro.

Pero tambe e elementonan den e pintura; nan ta forma un union harmonioso. Esey ta conta tambe pa e elementonan den e poema:

cu palabra e ta expresa algo cu no tin palabra; musica den silencio; presencia di amor den ausencia; so, pero liber di isolacion. Tur esaki y mas ta elemento importante cu Giolina ta mira como condicion pa pensa, pa por haci pregunta, pa haya sa kico ta e secreto, pa purba yega na e berdad.

E ta midi su palabranan, e ta hunga cu palabra y imagen, e ta crea imagen nobo. E ta ilustra su deseonan, su aspiracionnan, su preocupacionnan na un manera profundo y original. Y esey ta e forsa di e artista aki.

E temanan riba cua e ta elabora hopi, ta berdad, amor, morto, silencio, libertad.

Giolina ta dedica su obra “na tur esnan cu consecuencia, cu a bai laga nos cu nan aura di musica riba hala di amor, briyando den lus di bela na portal di libertad”. Morto no ta nifica fin; esnan cu a bay laga nos caba, a laga hopi cos pa nos, ta influencia nos bida keto bay y ta nos ehempel den bida.

 

Un artista cu un mensahe

Naturalmente tin hopi cos mas den e buki aki. Manera Giolina mes ta bisa: “Den mi arte semper tin un mensahe.”

Y no ta dificil pa haya sa kico ta e mensahe. Ta habri nos mester habri nos mes pa descubri, compronde loke e ta expresa den su poemanan y su pinturanan.

Giolina ta crea cu palabra y e ta forma un mundo den cua e buskeda pa berdad ta domina. 

Cu e publicacion aki e ta duna nos e oportunidad pa nos tambe explora e mundo aki.

Ta sigur, cu nos lo tende hopi mas di Giolina Henriquez.

E buki aki ta na benta den tur libreria y Giolina lo ta presente cu algun pintura y cu su buki den e evento “Encuentro cu Arte”, Diadomingo awor, dia 29 di October 2000, for di 19.30 or na Cas di Cultura.

 

Publica den “Bon Dia Aruba” d.d. 28-10-2000

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 





Biblioteca Nacional Aruba
George Madurostraat 13
Oranjestad Aruba
Phone +297 582-1580
Fax +297 582-5493
www.bibliotecanacional.aw
info@bibliotecanacional.aw

Branch San Nicolas
Peter Stuyvesantstraat z/n
San Nicolas Aruba
Phone +297 584-5277 /
+297 584-3939
Fax +297 584-5004


Dept. Arubiana/Caribiana
Bachstraat 5
Oranjestad Aruba
Phone +297 582-6924

Facebook   Google+ YouTube Pinterest LinkedIn