Graduadonan di estudio Master den idioma ta presenta nan tesis na Dept. Arubiana/Caribiana

Luna di october ta proclama pa Minister di Enseñansa y Famia como Luna di Enseñansa. Biblioteca Nacional Aruba a haci uzo di e ocasion aki pa invita e prome graduadonan di Aruba di estudio Master di idioma pa comparti cu docentenan y tur otro interesado den e materia e trabou grandi cu nan a haci cu a resulta den nan tesis Master. Durante 2 atardi, esta diamars 20 di october y diamars 27 di october ocho di e graduadonan ta presenta nan tesis.

Diamars 20 di october ta presenta sr. Willem Bant, MEd den Spaño, sra. Ryma Rincones-van der Linden, MEd den Hulandes, sr. Cedrick Kelly, MEd den Papiamento y sr. Cesar Kelly, MEd den Papiamento.

Diamars 27 di october ta toca turno na sra. Swinda Arendsz-de Cuba, MEd den Papiamento, sra. Maureen Molina-Luidens, MEd den Papiamento, sra. Zulaika Fernandes Perna-Silva, MEd den Papiamento y sra. Endrah Richardson-Gumbs, MEd den Ingles.

Nomber oficial di e estudio ta HBO-master idioma. E estudio aki tin un duracion di 2 aña. Por haci e estudio Master den 4 idioma, esta Papiamento, Hulandes, Ingles y Spaño. Personanan cu por haci e estudio aki ta personanan cu un Bachelor den un di e idiomanan menciona of un formacion ekivalente. E estudio aki ta existi for di 2009 na Universidad di Corsou.

Pa e estudio di aña 2013 pa 2015 Universidad di Corsou (UOC) a habri e posibilidad pa e studiantenan di Aruba sigui e estudio online via Blackboard collaborate y Smartboard. Instituto Pedagogico Arubano (IPA) a facilita espacio y infrastructura digital na e studiantenan. FDA a duna un aporte financiero pa Aruba. A crea un cooperacion unico entre Universidad di Corsou, sucursal di UOC na Boneiro y IPA. Den practica esaki tabata nifica cu e docente ta duna su college na un di e tres islanan y e studiantenan na e otro dos islanan ta sigui e college hunto den klas via e sistema digital. E sistema ta haci posibel tambe pa e studiantenan por comunica cu e docente y cu e otro studiantenan. E docentenan tabata bishita un bes pa modulo e otro islanan pa cera conoci cu e studiantenan. Tabatin docente di Aruba, Corsou, Boneiro, Puerto Rico, Hulanda, Suiza y Polonia.

Na Aruba a cuminsa un grupo di 32 studiante y 1 observador. Algun studiante a cay afo den transcurso di e estudio y na final tabatin 27 studiante: 12 pa Papiamento, 7 pa Hulandes, 5 pa Ingles y 3 pa Spaño.

Na juni 2015 a gradua 10 studiante, 6 pa Papiamento, 1 pa Hulandes, 1 pa Ingles y 2 pa Spaño. Na September a gradua un mas pa Spaño. Y tin mas graduado na caminda.

Biblioteca Nacional Aruba, en especial departamento Arubiana/Caribiana, ta hopi orguyoso di por presenta 8 di e tesisnan Master. Durante dos atardi e graduadonan, 4 pa cada atardi, ta presenta e trabou y investigacion cu nan a haci pa yega na nan tesis. Tin oportunidad pa haci pregunta. E presentacionnnan ta tuma luga na departamento Arubiana/Caribiana na Bachstraat 5, Oranjestad, di 5.30 pa 7.30 di atardi.

Un invitacion ta bay na un y tur, en especial docentenan y tur hende cu ta traha cu maneho di idioma, pa participa na e atardinan di presentacion. 


Graduadonan di estudio Master den Idioma ta presenta nan tesis:

Diamars 20 di october 2015, 5:30-7:30 pm

* Willem Bant M.Ed    ¿Me explico? Discurso y lengua de instrucción en la clase de español como lengua extranjera en un contexto multilingual : La perspectiva del alumno : Una investigación en el Colegio Arubano, Aruba. 

* Ryma Rincones-van der Linden M.Ed    Wat vind jij van het Nederlands? Onderzoek naar taalattitudes en taalgebruik van jongeren in het voortgezet onderwijs bij het schoolvak Nederlands en bij Nederlands als instructietaal in Aruba.

* Cedrick Kelly M.Ed    Influencia di dominio di idioma diario y dominio di idioma academico multilingual riba adkisicion di siñansa formal : E alumno monolingual y su recurso multilingual.

*Cesar Kelly M.Ed    Actitud linguistico di e migrante di habla spaño pa adkisicion di Papiamento, su integracion y identidad social den e comunidad multilingual di Aruba.

Diamars 27 di october 2015, 5:30-7:30 pm

* Swinda Arendsz-de Cuba M.Ed        Tur cos ta palabra.

* Maureen Molina-Luidens M.Ed    Pen inkt blanco bisti cu saya : Scritura femenino den poemanan Arubiano na Papiamento.

* Zuleika Fernandes Perna-Silva M.Ed    Papiamento como idioma base den enseñansa avansa :  Translingualismo den klas.

* Endrah Richardson-Gumbs M.Ed    Content Based Instruction in Aruban Mavo classrooms.

 





Biblioteca Nacional Aruba
George Madurostraat 13
Oranjestad Aruba
Phone +297 582-1580
Fax +297 582-5493
www.bibliotecanacional.aw
info@bibliotecanacional.aw

Branch San Nicolas
Peter Stuyvesantstraat z/n
San Nicolas Aruba
Phone +297 584-5277 /
+297 584-3939
Fax +297 584-5004


Dept. Arubiana/Caribiana
Bachstraat 5
Oranjestad Aruba
Phone +297 582-6924

Facebook   Google+ YouTube Pinterest LinkedIn