Gran Dictado di Papiamento

Diaranson dia 24 di september 2014 lo tuma luga e di tres ‘Gran Dictado di Papiamento’ na Cas di Cultura. Dos aña pasa a organisa e prome Dictado di Papiamento y despues, segun peticion general a bolbe organisa esaki na 2013 cu a keda proclama como Aña di Papiamento.
 

Fundacion Lanta Papiamento, cu sosten di Departamento di Cultura y Grupo Corector di Papiamento a dicidi di sigui realisa e evento aki. E Gran Dictado Nacional di Papiamento lo tuma luga den e sala di exposicion di Cas di Cultura cu e participantenan y na mes momento lo transmiti esaki den e sala grandi di Cas di Cultura. Asina e publico presente den e sala grandi tambe por sigui loke ta pasa den e sala chikito riba e pantaya grandi cu zonido. Alabes nan tambe por purba y controla con bon nan Papiamento mes ta. Un team di docente, trahado di Departamento di Enseñansa y algun Corector di Papiamento lo haci e trabou di corigi e dictado mientras lo sigui un programa pa entretene e publico den sala grandi. Prome cu anuncia e ganadonan lo splica e frasenan di e dictado hunto cu e participantenan y publico presente. E comision organisado ta spera cu e aña aki atrobe tur e participantenan cu ya a yega di participa den e Gran Dictado Nacional bolbe haci esaki y cu mas y mas hende tuma e reto pa haya sa con bon nan ta domina nan propio idioma. Aunke e participacion ta individual, bo por forma bo grupo y reta otro ken lo tin menos fout! Por inscribi na e e-mail adres fundacion.lanta.papiamento@gmail.com of na telefon 567- 2875.

Riba diaranson dia 24 di september e participantenan mester presenta pa 6:30 na Cas di Cultura pa registra y prepara pa e dictado mes cu lo cuminsa pa 7:00 di anochi.
Fundacion Lanta Papiamento





Biblioteca Nacional Aruba
George Madurostraat 13
Oranjestad Aruba
Phone +297 582-1580
Fax +297 582-5493
www.bibliotecanacional.aw
info@bibliotecanacional.aw

Branch San Nicolas
Peter Stuyvesantstraat z/n
San Nicolas Aruba
Phone +297 584-5277 /
+297 584-3939
Fax +297 584-5004


Dept. Arubiana/Caribiana
Bachstraat 5
Oranjestad Aruba
Phone +297 582-6924

Facebook   Google+ YouTube Pinterest LinkedIn