Herencia, Arte y Creatividad riba Dia di Betico

Bishita Museo Arqueologico, Museo Historico, Ateliers’89, Rietveld Academie y Stichting Rancho coriendo den tram
 
Diadomingo awor riba Dia di Betico for di 10 di mainta te cu 2’or di merdia, Museo Arqueologico, Museo Historico, Ateliers’89,  Rietveld Academie y Stichting Rancho den Oranjestad ta habri pa publico.  Conhunto ta trece un programa varia pero cu un enfoca comun riba sostenibilidad.
 
E aña aki e ‘ International Council Of Museums’ (ICOM), ta dedica e tema di Dia International di Museo na: ‘Museonan pa un Sociedad Sostenibel’. Museo Arqueologico lo incorpora e tema aki henter aña den su actividadnan publico.  Riba Dia di Betico lo inaugura un asina yama site exhbit den su auditorium . Arqueologo y nan asistente lo ta presente pa amplia riba e exposicion titula “Bon Bisiña”, cual ta  e tema di un proyecto di colaboracion entre Museo Arqueologico y Aruba Bank. Manera ta custumbra lo tin actividad creativo pa entretene y educa un y tur.
 
Museo Historico ta pone enfasis riba Aruba su herencia intangible cu dushi musica di caha di orgel como tambe un "Recordido den exposicion 1880 cu hoben pa adulto". Bow guia di e curadora di e exposicion aki Zahira Zaandam lo haci algo special cu e exposicion aki pa hoben y nan mayornan entre 10 y 2 or. E Exposicion aki ta un must pa bishita! Nelson Gonzalez, artista plastico, lo tin un exposicion den museo y cuadranan impresionante na benta.
 
Na Ateliers’89 lo tin delicatesa di pisca y tambe lo bende puyito y webo pa asina contribui na un sociedad mas sotenibel. Lo bende obranan di man traha pa muchanan como tambe artesania. Stichting Rancho lo habri e forno di kalki pa publico y na oficina di Fundacion Rancho den John G Eman straat 21 lo tin informacion di e tema 1815 Rancho 2015 asina tambe contribuiendo na salvarguardia nos herencia historico. Academy of Fine Arts & Design (antes Rietveld Academie)  lo habri su edificio y expone obranan di arte te cu 4’or di atardi na unda e studiantenan lo tin un sorpresa pa e bishitantenan.
 
Arubus tambe ta colabora y entre 10’or di mainta te cu 2’or di merdia e tram lo core su ruta den Playa asina conectando e instancianan pa publico mientras cu e.o. Monumentenfonds,  lo duna informacion riba e tram di e historia di Oranjestad y su monumentonan. Pa e dia special aki tur entrada ta gratis, pues un oportunidad pa tur esnan cu no a bishita nos Museo y instancianan di Arte ainda y pa esnan cu ta desea di haci esaki un biaha mas cu famia y amigonan. Feliz Dia di Betico!




Biblioteca Nacional Aruba
George Madurostraat 13
Oranjestad Aruba
Phone +297 582-1580
Fax +297 582-5493
www.bibliotecanacional.aw
info@bibliotecanacional.aw

Branch San Nicolas
Peter Stuyvesantstraat z/n
San Nicolas Aruba
Phone +297 584-5277 /
+297 584-3939
Fax +297 584-5004


Dept. Arubiana/Caribiana
Bachstraat 5
Oranjestad Aruba
Phone +297 582-6924

Facebook   Google+ YouTube Pinterest LinkedIn