Homenahe na heroe cu presentacion di buki Topa TULA

Biblioteca Nacional Aruba, Instituto Pedagogico Arubano y Departamento di Cultura Aruba tin e placer di invita e pueblo di Aruba pa asisti na presentacion di e buki Topa TULA. E presentacion ta tuma luga na Biblioteca Nacional Aruba, diahuebs 6 di maart  pa 7.30 di anochi.

Lo rindi homenahe na sr. Harry Zimmerman, conocido cantautor cu a gana Festival di Tumba di Corsou cu su tumba ‘Tula’. Harry Zimmerman tin hopi aña biba na Aruba y a contribui grandemente na musica y na Papiamento. Tambe lo duna homenahe na Olga Orman pa su trabou dedica na literatura, lesamento y idioma Papiamento. Olga Orman hunto cu Giselle Ecury a percura pa e produccion di e buki Topa TULA, trahando cu ‘Stichting Simia Literario’ na Hulanda. Den e buki Topa TULA, produci pa ‘Stichting Simia Literario’ tin contribucion di varios autor conoci di Aruba y Corsou.

Diahuebs anochi, 6 di maart, lo tin presentacion di diferente artista cu lo toca, canta, balia, declama y duna charla cortico. E documental ‘Mi no ta Katibu’, ‘Ik ben geen slaaf’ lo keda presenta pa Shanon Casper, co-productor, camera y editing; ta un produccion di Fundacion ProFor Hulanda. Mirto Laclé lo duna un charla relaciona cu ritonan ancestral.

Ta un gran honor pa por presenta un exposicion produci pa Universiteit van Amsterdam en coneccion cu ‘Conmemoracion 150 aña di Abolishon di Sclabitud’. Organisador y presentador di e anochi ta Mirto Laclé, kende ta celebra 40 aña den farandula educativo. Cada luna Mirto ta presenta un proyecto multidisciplinario cu enfoke riba literatura, arte, cultura , linguistica, educacion y lenga crioyo Papiamento.





Biblioteca Nacional Aruba
George Madurostraat 13
Oranjestad Aruba
Phone +297 582-1580
Fax +297 582-5493
www.bibliotecanacional.aw
info@bibliotecanacional.aw

Branch San Nicolas
Peter Stuyvesantstraat z/n
San Nicolas Aruba
Phone +297 584-5277 /
+297 584-3939
Fax +297 584-5004


Dept. Arubiana/Caribiana
Bachstraat 5
Oranjestad Aruba
Phone +297 582-6924

Facebook   Google+ YouTube Pinterest LinkedIn