Hour of Code: un evento mundial pa siña hobennan e principionan basico di programa

Aruba tambe a join e ‘Hour of Code’ cual a tuma lugar dianan 14 y 16 di december ultimo. E evento aki tawata un cooperacion entre scol basico Mon Plaisir, Colegio Arubano Oranjestad, SETAR, Aruba Digital Systems y Biblioteca Nacional Aruba.

E alumnonan di klasnan 4, 5 y 6 di scol basico Mon Plaisir a forma parti di  ‘Code Hour Aruba’. Cada klas a pasa un ora den computerroom di Biblioteca Nacional Aruba. Na un manera hopi divertido hobennan a experencia con pa traha un programa di computer. E alumnonan por a scohe entre temanan popular manera entre otro Frozen, Minecraft, Flappy Bird y a cuminsa traha di biaha riba dje.’Tawata master pa programa riba computer, real real!’, segun Jonchi, alumno di klas 5B di Mon Plasir. ‘Tawata bunita pa wak con henter e grupo di muchanan di basis tawata captiva pa e materia aki.’ Segun juffrouw Murielle Brown di Mon Plasir Basisschool. Tambe pa e specialistanan di IT e tawata un experiencia pa por drenta den e mente di un mucha y purba splica con programacion ta traha. ‘Pa grandi y chikto e tawata un experencia bon y hopi positivo’, asina Ivo Dongen, IT manager di SETAR a expresa.

Cu placer Biblioteca Nacional Aruba a pone nan Centro di Informacion Digital disponibel pa asina e alumnonan di e ultimo klasnan di scol basico Mon Plaisir por a ehecuta e tareanan aki.  Specialistanan di software di SETAR (desaroyadornan di apps) anteriormente a guia un grupo di alumnonan mas grandi di Colegio Arubano Oranjestad pa na nan turno, train, guia y fungi como coachnan di e alumnonan durante e evento. Ademas, specialistanan di IT di Aruba Digital Systems y SETAR a conseha e grupo encarga cu e proyecto pa lo cual ta trata e meta y organisacion di e evento en general. Subway a percura pa tur hende envolvi por a disfruta di pannan saludabel durante e evento.

Esnan cu a organisa e evento y e alumnonan cu a participa ta considera esaki uno hopi exitoso. Mirando e interes cu diferente otro actor den enseñansa a demonstra, ta hopi probabel cu lo ripiti e evento riba un escala mas grandi otro aña.





Biblioteca Nacional Aruba
George Madurostraat 13
Oranjestad Aruba
Phone +297 582-1580
Fax +297 582-5493
www.bibliotecanacional.aw
info@bibliotecanacional.aw

Branch San Nicolas
Peter Stuyvesantstraat z/n
San Nicolas Aruba
Phone +297 584-5277 /
+297 584-3939
Fax +297 584-5004


Dept. Arubiana/Caribiana
Bachstraat 5
Oranjestad Aruba
Phone +297 582-6924

Facebook   Google+ YouTube Pinterest LinkedIn