Ilustrador ta presenta su trabou na muchanan di scol

Biblioteca Nacional Aruba a invita un grupo di autor y tambe ilustrador y contador di storia pa yuda cu promocion di lesamento. Pa un siman largo tin un fiesta grandi di buki, storia, ilustracion, canto y baile. E festival di buki pa mucha ta tuma lugar dia 3 pa 7 di november proximo. Henter e siman aki tin bishita pa scol basico y preparatorio y tin actividad na biblioteca.

Buki pa mucha conoce storia y ilustracion. Autor y ilustrador ta traha hunto y ta complementa otro pa yega na un produccion balansa. Un balansa entre texto y imahen como cu mucha ta siña tanto for di e storia como e imahennan den buki. Sheila Werleman ta un di e ilustradornan cu lo bishita scol pa mustra su trabou.

Sheila desde chikito semper tawata pinta riba tur loke e por a haya. E tawata pinta riba recibo di awa di su mama, den schrift na scol. Den su afan y motivacion pa pinta Sheila a sigui su rumbo creativo na Modevakschool na Den Haag, Hulanda na aña 1994. Eynan un maestro a conseha Sheila pa sigui su estudio den Diseño Grafico. Asina el a sigui desaroya su mes na Grafisch Lyceum na Rotterdam na 1995 y despues na 2004 na Pratt Shool of Design na New York.

Su amor pa ilustracion pa mucha a nace cu e proyecto cu el a haci cu autor di buki Eveline Ruiz-Croes. Sheila a ilustra e buki pa mucha ‘Kitrin di Florin’. Trahando riba e ilustracion pa e buki aki Sheila a realisa cu e mucha den dje tawata kier a experencia su infancia di nobo.

Despues di 11 aña trahando na Desaroyo di Curiculo, Departamento di Enseñansa, Sheila a dicidi di pone su esfuerso den su propio compania ‘Smile Art & Design’ y e ta produci un revista yama ‘Cleconchi’y un website pa mucha www.cleconchi.com.

Sheila a ilustra diferente buki pa mucha manera: ‘Kitrin di Florin’ di e autor Eveline Ruiz-Croes, ‘Si bestia por a papia’ di e autor Jacques Thönissen, ‘Landa Lily’ di e autor Mili Arends y ‘Nini ta loer’ di Mercedes Petrocchi. Na 2011 Sheila a ilustra e buki 'Pepe Picuda y Didi Djindja' di e autor Desiree Correa, cu tabata e regalo di siman di buki. E aña aki el a ilustra e Regalo di siman di buki un biaha mas. Autor ta Charlotte Doornhein y e buki ta yama ‘E grito di e shoco - balia cu biento’.





Biblioteca Nacional Aruba
George Madurostraat 13
Oranjestad Aruba
Phone +297 582-1580
Fax +297 582-5493
www.bibliotecanacional.aw
info@bibliotecanacional.aw

Branch San Nicolas
Peter Stuyvesantstraat z/n
San Nicolas Aruba
Phone +297 584-5277 /
+297 584-3939
Fax +297 584-5004


Dept. Arubiana/Caribiana
Bachstraat 5
Oranjestad Aruba
Phone +297 582-6924

Facebook   Google+ YouTube Pinterest LinkedIn