Imahen como medio pa educa

Biblioteca Nacional Aruba, ta presenta 5 autor cu lo trata diferente tema di problema cerca hobennan. Esaki, diamars awor, dia 4 di november, di 6.30 pa 8.30 di anochi.

Un anochi cu autornan di Aruba, Corsou, Saba, Surnam, Hulanda y Merca. Lo tin presentacion di pelicula cortico y presentacion di powerpoint tocante problema cerca mucha y hobennan manera bullying-termento, miedo di faya, rabia y tedio, problema di hiv-aids, fobia etc. Manera ta conoci den cuenta y storia tur cos ta posibel. Pa cierto motibo mucha por cay den desbalansa y storianan ta yuda e mucha con pa anda cu problema.
 

Indra Hu-Ramdas di Surnam lo presenta un pelicula ‘Laat mij niet alleen’. E pelicula ta trata e tema encuanto Sida, hiv-positief, un tema cu ainda ta den e esfera tabu. Na un forma simpel y ludico Indra ta trata e problemática di Aids pa haci esaki comprendibel.
 

Irene Heim lo presenta su trabou di ‘Kidspower’, cuentanan di poder (power)cu e ta skirbi. E storianan y cuentanan aki ta duna e muchanan confianza y auto-estima y ta duna nan un bista intensivo den nan propio posibilidadnan y capacidadnan, pasobra cada mucha tin un poder y forsa den nan! E bukinan di e serie aki, denomina ‘Kidspower’ ta pa mayor, maestro, docente, educador, terapista y tur persona cu kier yuda na momento cu resulta cu un mucha cay den desbalansa. E storia y cuentanan aki ta skirbi cu fantasia, humor y na un manera cu ta yama atencion di e mucha y ta siña e muchanan na un manera ludico y activo con pa anda cu nan problemanan.
 

Charlotte Doornheim a skirbi e regalo di Siman di Buki pa Mucha pa Aruba, ‘De roep van de shoco’ -- ‘E grito di e shoco’. Charlotte Doornhein lo trata e buki y lo decodifica e QR-codes den e buki.


Tricia Chammaa lo trata e tema Bullying y ta presenta su buki Bully Billy black sheep.
Tio Ali à Ali Inecia lo presenta poemanan rítmico ‘Mannan di Futuro di Aruba’ . Michelangelo Koolman, cantautor di Aruba, lo presenta un dibuho anima recien produci di su canción ‘De Aruba pa ‘Cuba’.
 

Pueblo en general, docente, educador, instancianan cu ta traha cu mucha, muchanan di 12 aña pariba y nan mayornan ta bonbini.

Entrada: gratis.





Biblioteca Nacional Aruba
George Madurostraat 13
Oranjestad Aruba
Phone +297 582-1580
Fax +297 582-5493
www.bibliotecanacional.aw
info@bibliotecanacional.aw

Branch San Nicolas
Peter Stuyvesantstraat z/n
San Nicolas Aruba
Phone +297 584-5277 /
+297 584-3939
Fax +297 584-5004


Dept. Arubiana/Caribiana
Bachstraat 5
Oranjestad Aruba
Phone +297 582-6924

Facebook   Google+ YouTube Pinterest LinkedIn