Interesa den skirbimento?

Biblioteca Nacional Aruba ta ofrece dos tayer interesante tocante skirbimento. Un tayer di Skirbi biografia y un tayer tocante skirbi un articulo informativo/ensayo of Blog post. Tur dos tayer lo wordo dicta pa autor Quito Nicolaas. E tayernan ta tuma lugar na december y registracion ta habri caba.

E tayer ‘skirbi Biografia’ ta tuma lugar dialuna 12 december di 4or pa 7or di atardi. Diaranson dia 14 di december lo tin un tayer di skirbi un articulo informativo/ensayo of Blog post, di 4or pa 7or di atardi. Esaki pa esnan cu ta gusta skirbi y ta desea di profundisa nan mes un poco mas den e materia. Registracion ta posibel via info@bibliotecanacional.aw

Temanan cu sr. Nicolaas ta trata durante e tayer ta:

Biografia

  • Rekisitonan pa skirbi un biografia
  • Investigacion di material necesario
  • Un biografia como un potret
  • Diferente tecnica cu por uza
  • Diferente fuente pa aplica
  • Con ta ordena/selecta e material
  • Estilo y structura
  • Problemanan cu por topa cu ne
  • E rol di e escritor den e proceso

  Non-ficcion: articulo-columna-ensayo

  • Tema: Historico, social, cultural etc.
  • Topico: por ehempel ‘Enseñansa’
  • Aspectonan relaciona cu e tema
  • Estudio preliminar
  • Uzo di cienca social
  • Con pa argumenta
  • Limitacion y demarcacion di e tema
  • Con ta construi un argumento
  • Substancia e locual ta ser bisa
  • Con ta conclui e tema.

Sr. Quito Nicolaas ta duna informacion riba e topico ‘Con pa yega na publica bo buki y e ‘E proceso di publicacion’ den tur dos tayer.

Skirbi un biografia

Den e Tayer di Biografia bo ta haya un idea con pa skirbi esaki y con bo por scohe un personahe di e mundo di cultura, literatura, musica, baile, deporte, periodismo of politica pa skirbi su biografia. Un participante por dicidi tambe cu e ta bay scirbi su propio biografia, esta un autobiografia. Esei tambe por.

Durante di e tayer e participante ta siña kico tur e tin di tene cuenta cu ne y kico tur e tin di haci pa caba realisa e biografia. Lo trata paso a paso con bo ta bay ta hinca e biografia di e persona den otro. Un di e puntonan importante cu lo bin padilanti ta e material cu lo mester colecciona di e persona y con pa ordena esaki. Hunto cu e participantenan lo trata un modelo con pa colecta e datonan necesario y e forma mas adecua pa skirbi esaki. Un di tecnicanan cu lo trata ta esun di conduci entrevista, unda cu esaki ta necesario. Durante e tayer lo bin diferente ehempelnan padilanti di personahenan den historia di Aruba cu por skirbi un biografia. Ta bon pa e participantenan tin un idea caba di cual persona asina nan lo ke skirbi y ta recomendabel pa tin cierto preguntanan cu lo kier haci. E participantenan por duna nomber tambe di un personahe cu nan ta desea pa e docente uza como ehempel pa elabora ariba den e Tayer.

Despues di e Tayer tambe e participantenan lo por sigui ricibi e guia necesario te ora cu nan caba completa e buki. Un otro aspecto cu lo trata ta e proceso di publica bo buki: con ta financia e buki, busca un imprenta, e formato di e buki, uzo di un tipo di letter. E tayer lo ta uno completo cu ta encera for di e prome momento cu ta cuminsa traha na e biografia te ora cu esaki keda cla pa publica den forma di un buki. 

Skirbi un ensayo

Den e Tayer di non-ficcion (articulo, column, ensayo) lo trata e diferente aspectonan cu mester tene cuenta cu ne ora ta skirbi un articulo, columna of un ensayo. Asina por ehempel lo trata con bo ta analisa e topico di cual bo ke scirbi algo di dje. E tayer aki ta recomendabel pa studiantenan cu mester scirbi un ensayo of tesis pa nan estudio. Tambe lo para keto na e aspecto di con bo ta argumenta bo caso/ponencia. Asina diferente aspectonan lo keda trata durante di e tayer y na final di dia bo lo ta bon ekipa pa scirbi sea un articulo, columna of ensayo.

Despues di e tayer tambe e participantenan lo por sigui ricibi e guia necesario te ora cu nan caba completa e buki. Un otro topico cu lo trata ta e proceso di publica bo buki: con ta financia e buki, busca un imprenta, e formato di e buki, uzo di un tipo di letter. E tayer lo ta uno completo cu ta encera for di e prome momento cu ta cuminsa traha na e obra te ora cu esaki keda cla pa publica den forma di un buki.





Biblioteca Nacional Aruba
George Madurostraat 13
Oranjestad Aruba
Phone +297 582-1580
Fax +297 582-5493
www.bibliotecanacional.aw
info@bibliotecanacional.aw

Branch San Nicolas
Peter Stuyvesantstraat z/n
San Nicolas Aruba
Phone +297 584-5277 /
+297 584-3939
Fax +297 584-5004


Dept. Arubiana/Caribiana
Bachstraat 5
Oranjestad Aruba
Phone +297 582-6924

Facebook   Google+ YouTube Pinterest LinkedIn