Introduccion di MC

Introduccion di MC, bibliotecaria Lourdes (Des) Croes na occasion di Reapertura official di edificio central

Un poco mas cu 31 aña pasa, tawatin un ocasion bastante similar cu esun aki awe tardi. Y mi tawatey presente como un di e bibliotecarianan hoben cu a caba su estudio na Bibliotheek-en Documentatie academie na Hulanda. Por ta cu ta pesey mi tin e honor awe di ta para aki dilanti pa yama boso bonbini.

31 y pico aña pasa, prome di september 1982 sra. Alice van Romondt tawata para na e mesun luga aki y den su mensahe como directora di biblioteca e tempo ey  a yama bonbini na invitadonan local y internacional den e biblioteca nobis nobis aki den George Madurostraat . Tawata un dia hopi importante y emocionante, pa  motibo cu biblioteca na Aruba a drenta den un era nobo. Di un luga di fia buki na Wilhelminastraat, cu respet y reconocimento pa tur e trabou cu a desplega eynan, biblioteca den su edificio central nobo a inicia su desaroyo pa un centro dinamico y multifunccional.

Añanan a pasa y awe nos ta para aki un biaha mas.

Atrobe un dia grandi. Despues di un renobacion completo di e edificio nos ta celebra hunto cu boso e reapertura di e edificio central di Biblioteca Nacional Aruba. Y awe cu retonan nobo.

Den e mundo den cua e necesidadnan di e usuarionan ta cambiando, bibliotecanan rond mundo ta redefiniendo nan tarea y servicio.  Con ta sigui garantisa e servicio optimal na e usuario tradicional, pero alabes ta habri y prepara pa e usuario nobo cu a lanta den e mundo digital. Un mundo den cua e palabra inovacion ta clave. Un  mundo den cua no ta importa na unda e usuario ta, e kier e informacion y e kier e awo. E mundo di biblioteca digital.

Pa cumpli cu un servicio optimal na e mucha te na hende grandi, ta rekeri un edificio moderno y bon ekipa. Un luga na unda un y tur por yega libremente pa  haci uzo na su gusto di e facilidadnan cu ta ofrece, sea ta pa topa otro pa intercambia di idea, pa fia buki, pa busca informacion, pa haci uzo di computer, pa studia of simplemente pa lesa corant den tur trankilidad.

Biblioteca ta keda un instrumento esencial pa un comunidad bon educa y bon informa, un soño di nos tur. Hunto nos ta celebra awe un otro paso di un biblioteca cu kier brinda servicio optimal cumpliendo cu exigencianan  di e tempo aki.





Biblioteca Nacional Aruba
George Madurostraat 13
Oranjestad Aruba
Phone +297 582-1580
Fax +297 582-5493
www.bibliotecanacional.aw
info@bibliotecanacional.aw

Branch San Nicolas
Peter Stuyvesantstraat z/n
San Nicolas Aruba
Phone +297 584-5277 /
+297 584-3939
Fax +297 584-5004


Dept. Arubiana/Caribiana
Bachstraat 5
Oranjestad Aruba
Phone +297 582-6924

Facebook   Google+ YouTube Pinterest LinkedIn