Irmgard Frans ta conta storia na Aruba y Boneiro

Irmgard Frans a traha pa e tema di e aña aki "Griezelen" riba un publicacion nobo pa mucha, titula ‘De Griezelkriebel / E Griezelkriebel". Un buki di storia cu  ta pone bo den duda si di berdad spirito ta existi. E storia aki e lo conta muchanan di scol durante Festival di Buki pa Mucha 2017. Irmgard ta bishita scol pa un siman largo y despues e ta biaha pa duna su contribucion na e festival na Boneiro. Mester bisa cu e ta masha contento cu tur dos invitacion pa presenta su bukinan nobo. Diasabra ultimo Irmgard a presenta oficialmente su ultimo 4 bukinan na Bruna. Hunto cu "De Griezelkriebel" el a presenta tambe e ultimo 3 bukinan di e  serie di 12, di e dos mala muchanan "Bella y Edwin".

Irmgard Frans ta un persona creativo y hopi productivo ultimo añanan cu 14 publicacion riba su nomber. Trahando den su oranan liber y weekend el a logra bastante hopi. ‘De Griezelkriebel’ ta basa riba cosnan cu a sosode di berdad na cas di su mama y wela tempo cu e tabata mucha, manera;... ”un dia nos a scucha un hende ta cana den sala” (ora cu nos a bay wak no tabatin niun hende), “un dia nos a mira un sombra ta pasa dilanti bentana di camber” y ”un  otro dia nos a scucha tur e weyanan ta bati den cushina”. Cu tur e ingredientenan aki Irmgard ta traha su storia y ta sigui amplia esakinan usando su fantasia y creando dialogo entre e personahenan.

Irmgard Frans algun aña pasa a tuma e reto pa contribui na produci buki pa mucha na Papiamento. Un reto cu a bira un aventura cu Irmgard ta gosa hopi di dje. Su prome publicacion tabata na Hulandes ‘En ik droomde...’ na 2012. Despues Irmgard Frans a presenta un exposicion na biblioteca di 13 storia cu ilustracion ariba canvas, na Papiamento bou titulo di ‘Bella y Edwin … Pia, pa ki mi tin bo”. Y el a sigui cu mas publicacion di e personahenan, Bella y Edwin. ‘De Griezelkriebel’ na 2017 ta su di 14 publicacion. Ora puntre kico ta un obstaculo pa autornan? Su contesta ta: "Loke ta un poco dificil, ta e parti di financia un publicacion”. Esey ta keda un reto pa hopi autor y artista na Aruba. “Sinembargo mi ta sigui realisa mi meta. Mi mision ta: Pa na un manera artistico, crea storianan di identificacion y inspiracion, pa preserva e cultura di nos weganan di infancia, e goso y alegria di cada un di nos. Y esaki mi ta haci'e tambe den diferente forma, manera den un documentario y wega (bordspel). Mi otro meta pa futuro ta pa trece e storianan di identificacion den forma di short movies.  Mi no ta un hende cu ta sinta warda, mi ta sigui traha. Mi gusta reto, siña y bin cu proyecto nobo”. Di un idea ta nace un otro.     





Biblioteca Nacional Aruba
George Madurostraat 13
Oranjestad Aruba
Phone +297 582-1580
Fax +297 582-5493
www.bibliotecanacional.aw
info@bibliotecanacional.aw

Branch San Nicolas
Peter Stuyvesantstraat z/n
San Nicolas Aruba
Phone +297 584-5277 /
+297 584-3939
Fax +297 584-5004


Dept. Arubiana/Caribiana
Bachstraat 5
Oranjestad Aruba
Phone +297 582-6924

Facebook   Google+ YouTube Pinterest LinkedIn