Jorge Ridderstaat: The LAGO Story

Un parti importante di historia di Aruba describi den un buki nobo: The LAGO Story di Jorge Ridderstaat

Por lo menos shete aña largo señor Jorge Ridderstaat, economista, a studia historia di e compania di petroleo LAGO Oil and Transport Company na Aruba. Mayoria di su tempo liber e tabata entre otro den departamento “Arubiana” di Biblioteca Nacional Aruba y den Archivo Nacional pa investiga e compania aki cu a cambia rumbo socioeconomico di Aruba.

Cu un perseverancia grandi y un mente investigador fuerte señor Ridderstaat a pasa den tur literatura relevante pa por a pone tur e piesanan di e puzzel hunto den e buki “The LAGO Story: The compelling story of an oil company on the island of Aruba”.

Cas Editorial CHARUBA a tuma riba dje pa produci e buki y cu sosten financiero di Prins Bernhard Cultuurfonds Antia Hulandes y Aruba y Cede Aruba e buki impresionante aki a keda cla.

Diasabra awor, dia 1 di maart di 17.00 pa 19.00 or, tin un programa interesante na San Nicolas na ocasion di bautismo di e buki aki den y dilanti di e edificio di SINFA (San Nicolas Foundation for the Arts) na B. van de Veen Zeppenfeldtstraat.

Durante e atardi aki sr. Jorge Ridderstaat ta tene un charla tocante su obra di bida. Den e edificio tin un exposicion tocante e historia di LAGO. Aki e buki lo ta na benta tambe pa 65 florin. Naturalmente e autor Jorge Ridderstaat lo firma tur buki.

Pafo di e edificio lo tin musica di steelband y un show cultural pa recorda e ambiente di e tempo ey. CHARUBA ta invita specialmente tur ex-trahador di LAGO pa acudi na e celebracion aki di un publicacion grandi tocante un epoca importante den historia di nos pais.





Biblioteca Nacional Aruba
George Madurostraat 13
Oranjestad Aruba
Phone +297 582-1580
Fax +297 582-5493
www.bibliotecanacional.aw
info@bibliotecanacional.aw

Branch San Nicolas
Peter Stuyvesantstraat z/n
San Nicolas Aruba
Phone +297 584-5277 /
+297 584-3939
Fax +297 584-5004


Dept. Arubiana/Caribiana
Bachstraat 5
Oranjestad Aruba
Phone +297 582-6924

Facebook   Google+ YouTube Pinterest LinkedIn