Joy Rasmijn in memoriam

Diaranson ultimo e noticia tristo a drenta na Biblioteca Nacional Aruba cu Johannes Rasmijn, mihor conoci como ‘Joy’, a fayece den oranan di madruga. E noticia aki a laga empleadonan di biblioteca den un tristesa. Joy tabata un colega stima cu a bay laga nos mucho trempan.

Joy a drenta den servicio di biblioteca na 2002. Aki el a cuminsa traha den Binderij caminda ta drecha y encuaderna buki y corant. Como cu Joy tabata un persona cu por a haci diferente tipo di trabou, allround y un hende hopi practico, el a traha banda di su trabou den Binderij, cu hopi proyecto di biblioteca como handyman, carpente, yuda cu instalacion di exposicion, haci obra di man, diseña obheto, te duna un aporte cu actividad di mucha. Joy tabata  miembro tambe di personeelsraad di Biblioteca Nacional Aruba.
Su coleganan tin bon recuerdo di dje y nan lo no lubida Joy nunca, e tin un lugar special den curason di e trahadornan na biblioteca. Yosmar Sneek, hefe di departamento  Binderij ta expresa su mes di e manera aki: “Joyuos Joy” Asina mi ta yame y asina e ta pa mi, un persona semper alegre. Joy ta un tremendo trahador, kico bo pidie e por haci, un hende balente. Tur hende tabata busca Joy pa yuda cu un of otro trabou y e tabata coopera tur ora y semper dispuesto pa yuda tur hende. Joy tabatin un lema ultimamente “Si locual bo ta haci, ta haci bo felis, ami tambe ta felis”. Tin ora tabatin situacion fastioso pero tog e no ta papia malo di hende, e tabata di opinion cu si e hende ta gusta loke e ta haci, e ta felis. E tabata haci su trabou bon y cu dedicacion. Hopi biaha e ta haci cos cu no ta ni su trabou.  Joy ta bay haci masha hopi falta na biblioteca.”

“Johannes ‘Joy’ Rasmijn (1971) ta un colega hopi stima na biblioteca” Asina Astrid Britten, directora di biblioteca ta conta “Joy a keda traslada na september 2002 pa biblioteca for di Cuerpo di Bombero, un persona hopi clave, tur cos cu pasa den su man e ta ‘pak op’ cu hopi entusiasmo y  dedicacion. Manera Yosmar a bisa, ki ora cu tin algo di haci mes ora su nomber ta cay. Diaranson mainta cu nos a haya e tristo noticia cu Joy a bay laga nos, esaki a causa un shock cerca tur su coleganan. Semper e tabata ripiti e dicho di su welo “No puntra mi con, pero regl’e” y asina e ta soluciona tur cos, esey tabata su manera di pensa y traha. Busca solucion practico. Y e tabata yuda tur caminda tanto na biblioteca como cerca famia y den comunidad. Pa loke ta trata historia di Aruba, e tabata sa hopi y tabata gusta splica y conta di esaki. Joy a forma parti di e produccion ‘A Royal affair’ cu gobernador a laga realisa den cuadro di 200 aña den Reino. Joy ta laga atras su señora Sandra y yiu muher Joandra y yiu homber Joyson. Staf y personal di Biblioteca Nacional Aruba  ta extende palabra di condolencia na su famia, na su mama , su rumannan, wela y cuñanan. Nos lo recorda Joy como un persona hopi dedica na su trabou.Tur locual e tabata haci, e tabata hinca hopi amor, dedicacion  y pasion aden. Nos ta sigui pero sin Joy biblioteca lo no ta mescos. Dios a dispone otro.”

Cerca varios colega Joy a comenta cu e  tabata hopi orguyoso di su yiunan. Joy un persona hopi alegre, hopi lief  tambe humoristico, bo lo keda Semper den nos mente. Sosega na paz.

Ultimo lunanan Joy a yuda na departamento Arubiana cu reorganisacion di e coleccion di corant. Des Croes, encarga cu departamento Arubiana, ta comenta cu locual ta resalta cerca Joy ta su habilidad di organisa. E ta un hende hopi analitico y practico. Des a haya ayudo di Joy den diferente exposicion grandi y den cada proyecto el a descubri un otro talento di Joy. “Locual semper mi a gosa di dje ta su pasion cu e ta hinca den e trabou cu e ta haci, principalmente si ta algo den cua e por uza su creatividad artistico. E tabata tin wowo pa detaye. Nos tur na Arubiana lo sinti un falta grandi di Joy, no solamente pa su ayudo den trabou, pero specialmente pa su humildad, cariño y alegria cu el a demonstra na nos.”

Por bisa hopi di  e persona Joy, hecho ta cu el a laga su rastro atras na Biblioteca Nacional Aruba. Joy a duna un contribucion balioso como trahador, colega y amigo. Cu Joy drumi dushi den brasa di señor pa eternidad.

 

 

 





Biblioteca Nacional Aruba
George Madurostraat 13
Oranjestad Aruba
Phone +297 582-1580
Fax +297 582-5493
www.bibliotecanacional.aw
info@bibliotecanacional.aw

Branch San Nicolas
Peter Stuyvesantstraat z/n
San Nicolas Aruba
Phone +297 584-5277 /
+297 584-3939
Fax +297 584-5004


Dept. Arubiana/Caribiana
Bachstraat 5
Oranjestad Aruba
Phone +297 582-6924

Facebook   Google+ YouTube Pinterest LinkedIn