Laura Quast

Laura Quast a nase na Kòrsou den bario di Otrobanda, ku ta parti di Willemstad, kapital di Kòrsou. Laura ta mayó di nuebe yu. Ora e yunan hasi kos di bon mucha, Laura su mama Lula tabata konta nan kuenta masha dushi mes. Laura su soño tabata pa dia e bira grandi, e tambe bai konta kuenta, anto mes bon ku su mama. Laura ta gusta lesa. Tin biaha e tabata skonde su buki bou di su kusinchi, anto anochi e tabata lesa un tiki afó te ora e pega soño. Laura ta gusta poesia tambe. E tabata skirbi hopi poema den su agènda.

For di chikitu Laura ker a bira yùfrou di skol, i esaki a bira realidat tambe. Dies aña largu el a duna muchanan di skol básiko lès. Den su tempu liber Laura tabata hunga komedia. Na skol e tabata laga e muchanan dramatisá kuenta, i e muchanan tabata gosa un bòl! Laura a haña gana di sa kon ta traha obra di teatro, p’esei el a bai Hulanda pa studia pa direktor i dosente di teatro. El a studia na skol di teatro na Amsterdam, pa por traha ku teatro ku hóben i hende grandi. Laura mes ta gusta aktua mashá tambe. El a aktua den obranan manera: Ilushon di Anochi di Shakespeare, Un anochi largu,Tula, Un kayente un friu, pero tambe el a hunga den kuentanan di Nanzi, i di Kompa Leon ku Kompa Konènchi.

Ora Laura aktua i ekspresá, tur ferdrit, tur miedu, tur dolor ta bula bai leu; e or’ei ta alegria so e ta sinti. Laura su pashon ta pa siña hóben kon ta skirbi i konta kuenta, kon ta deklamá un poema i kon nan mester praktiká pa hunga un ròl den un kuenta. Laura ta skirbi kuenta i poesia, pero e no a publiká nan ainda.

Dia Laura a bini bèk for di Hulanda, el a bai traha komo dosente di drama na Akademia Pedagógiko. Einan hóbennan ta studia pa mener i yùfrou di skol. Nan tabata siña serka Laura kon hasi wega di pòpchi, traha obra pa mucha i presentá esaki na tur mucha di skol. Un dia e studiantenan a traha un obra di un mucha ku ta snup i no gusta skeiru djente. Nan a traha un boka grandi di foam, anto e studiantenan mes a bisti na djente. Anto ora e mucha snup, e djentenan ta rabia, bula sali for di boka di e mucha i kore limpi bai, laga e mucha sin djente...

Laura ta stima nos dushi papiamentu, p’esei el a bai studia papiamentu na Universidat di Kòrsou. Awor e tin su diploma di Bachelor i ta kabando su estudio di Master den papiamentu. Arte por ta músika i kanto, baile, arte plástiko i arte di palabra manera kuenta, poesia i teatro. Den arte nos ta ekspresá kiko nos ta sinti i pensa i asina nos por krea un mundu mihó.

Hende ta na mundu pa hasi bon, sinti bon, pa duna i risibí amor. Ta p’esei Laura ta aktua, konta kuenta i deklamá poesia, pasobra ARTE ta pone bo sinti forsa i kurashi pa stima i biba bida.





Biblioteca Nacional Aruba
George Madurostraat 13
Oranjestad Aruba
Phone +297 582-1580
Fax +297 582-5493
www.bibliotecanacional.aw
info@bibliotecanacional.aw

Branch San Nicolas
Peter Stuyvesantstraat z/n
San Nicolas Aruba
Phone +297 584-5277 /
+297 584-3939
Fax +297 584-5004


Dept. Arubiana/Caribiana
Bachstraat 5
Oranjestad Aruba
Phone +297 582-6924

Facebook   Google+ YouTube Pinterest LinkedIn