Lesa…...lesa pa bida

Conoce bo storia

Lesa…...lesa pa bida

Kico bo ta pensa di lesamento? Bo ta gusta lesa? Of bo no ta gusta? Dicon? Hopi di nos a haya nan mes ta lesa den contexto di scol, un contexto di obligacion, bo mester a lesa.

Placer den lesamento. Lesa pa placer. Kico ta placer di lesamento? Y con ta desaroya esei? E placer di lesamento no ta conoci pa hopi hende. Esei por tin hopi motibo. Kizas mester a siña lesa den un idioma cu no ta e idioma materno. Por ta cu lesamento tabata wordo asocia cu siñamento. Por ta mester a lesa buki cu no tabata tin nos interes. Hopi cos tin cu por ‘daña’ e placer di lesamento.

Danki dios cu na ki momento cu ta den bida nos por saca lesamento foi di su contexto cu ta trece recuerdo poco negativo cu ne y purba di nobo. Lesando loke bo kier lesa. Habri poco poco e porta bek. Bayendo pa un otro intento, un second chance......lesa por ta dushi?....Ban wak.....

Storia

Tur hende ta gusta storia. Storia den ki forma cu ta. Kizas nos ta gusta scucha otro conta nos un storia. Kizas nos ta gusta experencia un storia, expresa visualmente pa medio di teatro, videoclip of cine. Kizas nos ta gusta un storia canta. Kizas nos ta gusta di forma parti di un storia. Den tur tempo hende a gusta un bon storia. Storia cu a yega na nos den diferente forma. Storia di nos, storia di otro, storia di leu, storia di cerca, storianan di bida. Hende ta gusta storia. Esei sin duda.

Tin hopi material di lesa pa scohe. Storianan ta viaha, di lugar pa lugar, den tempo, di un persona pa un otro. Storia ta cambia of ta keda mes cos. Storia ta producto creativo di e ser humano. Tin storia cu nos ta bai busca y tin storianan ta bini cerca nos. Storia ta pone nos biaha den tempo, den cultura, den distancia. Nan ta hiba nos leu....pa nos concoce otro pais, otro hende, otro temporada, conoce nos mes....mas mihor. Storia ta testimonio di nos bida of di otro. Storia ta pa comparti. Storia ta yega cerca nos por ehempel den forma di novela.

Novela

Di novela nos conoce hopi genero, novela romantico, thrillers, detectives, horror, novelanan historico, autobiografia, storianan cortico, storia di bida riba laman, storia di guera, relato di viaje, science fiction, fantasia, magia, storia di secreto scondi, suspenso, storia di bestia, storianan biblico, ta hopi tin. Y den esaki tin un variedad di buki cu por scohe riba diferente nivel, skirbi den diferente estilo, pa diferente grupo meta, pa un y tur. Novela cu nos ta lesa pa entretenimento, pa diverti, pa scapa di nos realidad, drenta den un otro mundo, pa ta den zapato di otro pa un rato, pa identifica cu e personahe of no, cana un rato cu un otro persona, pa enrikece nos imahinacion, haci nos mundo mas grandi, amplia e horizonte. No tin limite te na unda storia por hiba nos.

Informativo

Nos ta busca informacion riba diferente tema. Tema cu ta interesa nos. Tema cu nos mester sa algo mas di dje pa un of otro motibo. Bukinan informativo tin, riba tur cos, bo no por imagina bo mes cuanto tin. Topiconan cu nunca bo no a tende di nan. Hopi buki riba e mes un topico, den diferente idioma, di diferente autor, sin fin. No ta yega nunca un fin na e diversidad di bukinan informativo cu hende ta produci, e ideanan cu ta biba. Bo drenta un biblioteca of libreria un mundo ta habri.

Educativo

Nos ta curioso, nos kier siña. Nos kier sa kico ta kico. Con e la bira asina, pakico, e dicon di esaki, esaya. Nos kier siña di diferente cos, henter nos bida, nos ta busca pa nos educa nos mes. Pa nos por yuda educa otro, pa nos forma un opinion, pa nos por eherce un trabao, un hobby, pa nos por yuda nos mes. Y esei por, danki dios, entre otro pa medio di buki, por lo escrito.

Actualidad

Nos kier sa kico ta pasando rond di nos. Kico ta pasando den nos comunidad cu nos ta forma parti di dje. Kico ta pasando rond mundo, e mundo grandi cu nos ta un parti chikito di dje, un punto riba e mapa, kico ta pasando cu nos beciña, nos amigonan, e ciudadanonan di otro pais, miembronan di otro pueblo, nos kier sa. Y ta pesei nos ta keda na haltura, pa medio di corant, revista, Internet, y mas. Nos kier sa. Pesei, nos ta lesa y scucha actualidad y noticia. Nos ta kaweta. Sigur no!

Tin ora bo ta puntra bo mes....di kico hende no a skirbi? Tin un tema un topico cu no a wordo cubri? Tin un storia cu no a wordo conta? Kico nos no a lesa? Abo sa e contesta? Bo por imahabo cu un hende ta bishita un biblioteca anto ta bisa cu no tin nada di lesa? Kico esei ta bisa di e persona ey?

Lesa

Lesa pa bo sa kico otro ta pasa aden, kico otro ta experencia, con otro ta soluciona cierto cos, problema, reto.....lesa pa bira consciente, pa ta informa, pa educa bo mes of otro, lesa pa sa di esaki y esei, lesa pa sa di esun y e otro, lesa pa sa di mundo y es mas. Usa bo imaginacion, encontra un experencia comun, siña algo nobo, bira mas sabi, haya sa di diferente perspectiva, cuestiona bo kerencia, bira mas all-round, hiba un bon combersacion,  sea mas alerta, biba mas consciente, pasatempo, gana mas confiansa, experencia aventura di otro, bira mas productivo, reemplasa habitonan negativo, relaha, lesa un storia prome cu drumi, haya solucion, crea retonan nobo, bira mas feliz (Lesamento ta terapeutico), utilisa tecnologia mas mihor, mehora bo skirbimento, bai lugarnan cu bo no a bishita nunca, conoce otro hende, expande bo vocabulario, haya contesta, entretene bo mes, haya idea nobo, sea diferente, mehora bo concentracion, tene e mente activo, haci ehercicio pa bo celebro, siña, bira mas creativo, comete menos eror, reduci stress, traha mas placa, bai dilanti den bo carera, haya un mihor trabao, haya un mihor salario of un promocion.

Si e oportunidad ta presenta su mes, tuma e tempo pa lesa pa un mucha of sea un bon ehempel dor di lesa bo mes. Tur hende lo beneficia di esaki, e mucha, abo, nos comunidad, mundo henter.

Lesamento ta un manera lihe y simpel pa alimenta bo alma pasobra e ta un actividad solitario. Pa bo ta bo so, al menos den bo pensamentonan, riba un base regular ta crucial pa bo ‘sense of self’.

E ta mas facil pa bo duna di bo mes ora bo ta sinti bo yen y satisfecho. Hasta un par di minuut di lesamento lo tene bo bon henter dia. Y claro bo sa cu bo a lesa algo bon ora cu e locual cu bo a lesa ta pone bo pensa y refleha. Lesamento ta mes cos manera  tur otro cos, tin beneficio si bo hacie regular. No sinti bo malo ora cu bo ta tuma tempo pa lesa. E ta bon pa bo! Asina e ta lesa....lesa....lesa pa pura bida.

 





Biblioteca Nacional Aruba
George Madurostraat 13
Oranjestad Aruba
Phone +297 582-1580
Fax +297 582-5493
www.bibliotecanacional.aw
info@bibliotecanacional.aw

Branch San Nicolas
Peter Stuyvesantstraat z/n
San Nicolas Aruba
Phone +297 584-5277 /
+297 584-3939
Fax +297 584-5004


Dept. Arubiana/Caribiana
Bachstraat 5
Oranjestad Aruba
Phone +297 582-6924

Facebook   Google+ YouTube Pinterest LinkedIn