Lesamento prome cu bay drumi

Lesamento prome cu bay drumi

Ora bo lesa un buki hunto cu bo yiu, of djis wak e plachinan den e buki, e ta trece un ambiente dushi y calmante pa mayor y yiu. Lesamento no ta djis un pasa tempo, sino e ta stimula e desaroyo di bo yiu. E ta stimula su fantasia, su desaroyo social, cognitivo, emocional y su habla. Ora bo lesa un buki pa bo yiu e ta sera conoci cu e mundo den e buki.

Mayornan cu lesa pa nan yiu di chikito, ta sina miho na scol, nan ta mas motiva pa sina lesa, nan habla y comprondemento di textonan ta mas mihor.

Benificionan di lesamento prome cu bay drumi

Despues di un dia druk cu yen di actividad na scol, cas of centro di mucha, mester tin un momento relahante. Lesamento prome cu bay drumi ta crea un momento placentero y relahante pa mayor y yiu. Mayornan por hacie un rutina pa lesa pa nan yiu ora e ta den su cama. E lesamento ta relaha su mente y ta pone pega sono. Tene cuenta cu otro cos cu por kita su atencion, p.e. televicion of radio. Paga esakinan. Lesa trankilo y usa diferente tono di boz.  

Ki edad mi yiu mester tin pa mi por cuminsa lesa p’e?

Desde 3 luna:

Desde e momento cu un baby cuminsa bira kaweta pa wak su alrededor y por tene algo den su mannan, bo por cuminsa lesa p’e. Mayornan por usa buki di carton of plastic diki cu tin plachi grandi riba dje. Usa plachinan den buki cu bo baby por reconoce den su alrededor. Punta dede riba e plachi y menciona e obheto.

Peuters 2-4 ana:

Muchanan entre dos pa tres ana gusta tende un storia cortiko mientras nan ta wak e plachi den buki. Desde e edad di tres pa cuater ana e storia por bira mas dificil. Plachi ta keda hunga un rol importante den e buki. Textonan simpel cu ripitishon y rima ta hasi e storia interesante. Textonan asina ta yuda e mucha pronostica kico lo por pasa despues. E ta stimula bo yiu pa lesa duro y ripiti rimanan.

Kleuter desde 5 ana:

Mayornan por cuminsa lesa storianan mas largo cu un mucha di cinco ana. Interaccion (papia tocante e storia) ta importante durante lesamento.

Muchanan cu por lesa: 

Ora bo yiu cuminsa lesa no stop di lesa p’e. Tin biaha un storia ta muchu dificil pa e mes lesa of compronde. Sinembargo, mucha ta hana leuk pa lesa hunto cu nan mayornan. E ta mesun leuk cu ora sinta wak un pelicula.

Algun tips:

  • Ta importante pa mayornan sa kico ta para den e buki prome. E ta hacie mas facil pa splica algo cu ta para den e buki y e ta lesa mas facil.
  • Traha bo mes un rutina di lesamento. Lesa e buki na un luga keto y confortabel. Esaki no mester tuma lugar solamente prome cu bay drumi, sino durante dia tambe.
  • Wak e kaft hunto. Lesa e titulo di e buki y papia tocante esaki hunto cu bo yiu. Hacie curioso pa e contenido.
  • Duna bo yiu chens pa comenta riba e contenido di e buki, y papia cune tokante esaki.
  • Na momentonan cu suspenso laga bo yiu pronostica loke ta bay pasa. Esaki ta stimula su pensamento y por yud’e den momentonan cu e tin cu tuma un decision.
  • Splica palabranan dificil. Bo yiu lo sina palabranan nobo.
  • Tuma un dia pa papia tocante e buki.
  • Haci e storia interesante. Mientras cu bo ta lesa bo por haci movecion of zonidonan cu ta haci e storia interesante.
  • Lesa e buki un otro biaha atrobe. Por ta cu bo yiu ta puntra bo pa lesa e mesun buki mas cu un biaha den e mes un siman. Haci esaki. Cada biaha bo yiu ta sina algo nobo.

Dus, sigui lesa pa bo yiu, y stimula lesamento, vooral si e ta haye leuk.

Fuente: www.peuterplace.nl/taalontwikkeling

Pa pregunta y mas informacion riba educacion por acerca
Fundacion Pa Nos Muchanan na Cumana 2,
Tel: 583-4247 / 588-0856, fax. 583-5658
 e-mail: info@fpnm.aw





Biblioteca Nacional Aruba
George Madurostraat 13
Oranjestad Aruba
Phone +297 582-1580
Fax +297 582-5493
www.bibliotecanacional.aw
info@bibliotecanacional.aw

Branch San Nicolas
Peter Stuyvesantstraat z/n
San Nicolas Aruba
Phone +297 584-5277 /
+297 584-3939
Fax +297 584-5004


Dept. Arubiana/Caribiana
Bachstraat 5
Oranjestad Aruba
Phone +297 582-6924

Facebook   Google+ YouTube Pinterest LinkedIn