Lidrick Solognier ta toca pa Benefit Concert

Carlos Bislip jr. hunto cu coleganan musico ta organisa un ‘Benefit concert’cu musica varia. Esaki ta tuma lugar na Cas di Cultura diasabra dia 16 di augustus y ta cuminsa 8or. Cantantenan cu ta deleita publico ta Vale Croes, Placido Hazel, Rocco Flava y Tommy Lee. Musiconan ta entre otro Delbert Bernabela (Saxofonista), Franklin Granadillo (Trompet), Angelo Kock (Keyboard), Ivan Quandus (Baho), Lidrick Solognier (Drums y conga) y Carlos Bislip jr. (Percussion y dirigente)

Lidrick Solognier (’93) ta toca den banda ‘Duro’ y casi tur weekend nan ta toca, un banda di mas o menos 10 musico. Duro ta toca pa fiesta y otro evento. Esaki ta trece poco ‘zakgeld’ pa Lidrick cu ta un studiante na Colegio Arubano. Tin ora ta poco druk pero te ainda el a logra di combina e bida di studiante cu e trabou di musico. Y alabes e ta siña hopi di e otro miembronan di e banda ‘Duro’ tocando Conga y Drum. Den siman e ta sigui les di piano cerca sr. Johnny Croes y les di Drum cerca sr. Carlos Bislip jr. Na Scol di Musica Rufo Wever (Cas di Cultura).

Lidrick a cuminsa cu su formacion musical cu 4 aña. Entre otro cu les di cuarta (Cerca Doedel Sofia), poco despues cu les di drum y les di viool y curso di Timbal, Conga y Bongo. For di aña 2000 Lidrick ta participa den festivalnan di Dande. Na cuminsamento tocando e Wiri y Tambu den e grupo "La Bomba". Na aña 2003 el a participa pa prome biaha como cantante di Dande cu e grupo "La Bomba" y a toca Tambu cu e grupo di Edseliene Figaroa. Na aña 2004 Lidrick a bolbe participa como cantante di Dande pero cu e grupo "Ritmo y Mas" bou direccion di Edseliene Figaroa. Y finalmente na aña 2005 el a bira Rey di Dande den categoria 10 pa 12 aña cu e grupo "Amor pa folklor" bou direccion di Danilo Vrolijk. Lidrick a sigui duna presentacion musical hopi caminda y den cooperacion cu diferente artista local. Na e mesun aña Lidrick a cuminsa cu un curso di Timbal, Conga y Bongo, cerca Fio Wester. Na aña 2006 Lidrick a participa na un workshop di Pop y Jazz, cual a wordo duna pa un docente di Conservatorium di Maastricht. Na aña 2006 Lidrick a participa na un workshop di Chichi Peralta na Cas di Cultura y akinan tambe el a haya e oportunidad pa toca un tiki cu Chichi Peralta. Otro musiconan cu Lidrick  a acompaña tabata Freddy Franken, un musico di Puerto Rico, tambe el a bay toca na Hulanda cu un blazersensemble na edad di 14 aña den Concertgebouw na Amsterdam pa e Nieuwjaarsbal pa La Reina . Tambe el a sigui un curso na Cuba pa un luna largo pa ritmo y instumentonan Cubano. Mientras tanto Lidrick ta sigui tuma les di Drum y piano na Scol di musica Rufo Wever.

Bo ta kere cu ta dificil pa mucha haya les di musica? “Tin biaha si. Bo ta ripara cu mayornan no por paga e les of nan no ta motiva e yiu suficiente of e mucha no ta haya sa kico tur ta posibel. Tin ora tambe nan ta bisa un mucha cu e no ta bay haya trabou como musico, loke no ta berdad.”
“Cerca mi, tempo cu mi tabata chikito, mi tata, cu tambe ta musico, a haci esfuerso pa mi haya les, mi a cuminsa tuma les cerca sr. Pedro (Chencho) Kelly. Despues mi a bay FDEC y Cas di Cultura. Bo tin cu haci poco esfuerso si pa busca oportunidad pa crece y siña mas. Un dado momento ta bon pa sigui studia afo.”

Bo ta toca tur aña den un evento musical cu Carlos Bislip jr. Boso ta practica duro pa esey? “E ta depende, normalmente un siman prome cu e evento nos ta cuminsa. Pa mi e ta mas facil pa siña e pieza si tin bladmuziek.”

Kico ta bo deseo pa futuro?  “Mi kier sigui studia musica den futuro. Mi deseo ta pa bay studia na Berkley College na Merca of Conservatorium na Hulanda, pero tur esey ta depende si den futuro por haya un scholarship, ya cu e scol ey ta basta caro. Tambe mester haci un auditie  pa por wordo acepta na un scol di musica den exterior. Kizas mi ta bay den direccion di percusion clasico pero mi no ta sigur ainda.”

Fans di Lidrick ta bon bini na Cas di Cultura diasabra 16 di augustus. E Benefit concert ta cuminsa 8or. Prome cu e presentacion tin un rato cu por combersa cu Lidrick y e otro musiconan den lounge di Cas di Cultura. Amantenan di musica ta bon bini pa ta parti di e evento musical special aki.

 





Biblioteca Nacional Aruba
George Madurostraat 13
Oranjestad Aruba
Phone +297 582-1580
Fax +297 582-5493
www.bibliotecanacional.aw
info@bibliotecanacional.aw

Branch San Nicolas
Peter Stuyvesantstraat z/n
San Nicolas Aruba
Phone +297 584-5277 /
+297 584-3939
Fax +297 584-5004


Dept. Arubiana/Caribiana
Bachstraat 5
Oranjestad Aruba
Phone +297 582-6924

Facebook   Google+ YouTube Pinterest LinkedIn