Liliana kier pa tur mucha lesa

Liliana Braamskamp-Erasmus lo ta cu nos tambe na e Festival di Buki pa Mucha 2013. Un festival pa stimula lesamento bou di mucha, hasiendo esaki pa medio di un programa diverso di contamento di storia, lesa hunto, lesa fragmento di storia, musica y canto, declamacion di poesia y otro medionan. “Buki, buki den wega, pianan na careda” ta e lema di e festival e aña aki cu ta basa riba e tema di Wega y Deporte.

Desde chikito Liliana tabatin un pasion enorme pa skirbi. El a skirbi su prome articulo pa e corant di scol dia e tabatin 6 aña di edad y el a gana su prome premio ‘Brief van de Maand’ (Carta Di Luna) pa e revista di mucha Matinette – dia e tabatin 9 aña di edad. Despues cu el a haci un yamado na e revista infantil Spaño ‘Tú’  Liliana a haya ‘penvrienden en –vriendinnen’ na tur parti di mundo.  El a recibi mas cu 100 carta pa siman y e cartero a kere cu Liliana cu ya cu 11 aña tabatin su propio compañia caba.

Liliana su prome buki Rima Rond di Aruba a wordo publica na 2003. Ta bon cu el a bira un éxito grandi cu asina Lilianan por a inventa hopi mas storia pa su lesadonan na Aruba. E ta autora di diferente pakete di poesia, cantica, ‘prentenboek’, programa radial, obra di teatro cortico, pero tambe cuentanan largo, tur esaki na su lenga materno, Papiamento.  Pa e muchanan di Hulanda y Belgica, e ta skirbi buki pa lesa y scucha y pa hende grandi, cuentanan cortico y columna cu historianan cu a pasa di verdad di cuminda, por ehempel, di biaha of di naturalesa.

Na 2012 Liliana su prome ‘thriller’ di mucha ‘De Knijpkat’ a ser publica na e imprenta Delubas. E aña aki e ta presenta y duna como obsekio hunto cu e artista sueco Moritz Ebinger y e fondo literario Hulandes, e buki ‘Terug naar de Antilla’ (den cuater idioma) na tur e scolnan basico na Aruba. Hunto cu Kiwanis Club Of Aruba e ta traha na e proyecto Kamishibai pa haci lesamento mas atractivo.  Tur scol na Aruba lo haya un obra di cuenta Hapones cu un par di cuentanan emocionante di regalo. Liliana ta traha cu smaak na diferent proyectnan, pero skirbi ta keda su pasion. Pesey e ta bezig cu su prome novela hubenil (na Hulandes) un historia cu lo realisa na Aruba y cu ta trata di oro, masha hopi oro mes.

Banda di escritora, Liliana ta ilustradora, un lesado progresista tambe  (esey ta un hende cu ta gusta lesa y cu lo gusta si mas hende haci esaki, stima buki.) E ta fundadora hunto cu dos amiga di dje di e Fundacion Papiamento (2004), pa asina tur hende aki na Aruba contagia cu e goso di lesa.

Liliana Braamskamp-Erasmus ta biba actualmente na Aruba cu su casa Albert, yiunan, Enric, Alyza y e pushi preto Berry,  cu - sin gaña – ta gusta baña bou di douche!

Den siman di 1 pa 8 di November e grupo di escritor y contado di cuenta lo bishita 65 scol cu presentacionnan atractivo y diverso. Pa muchanan cu no ta haya un bishita di autor na scol tin un programa di actividad na biblioteca merdia, tanto na Playa como na biblioteca San Nicolas. Tur mucha ta invita pa e fiesta di apertura diabierna dia prome di november dilanti biblioteca pa 5 or di atardi. Tur actividad ta gratis.

 

 

 

 

 

 





Biblioteca Nacional Aruba
George Madurostraat 13
Oranjestad Aruba
Phone +297 582-1580
Fax +297 582-5493
www.bibliotecanacional.aw
info@bibliotecanacional.aw

Branch San Nicolas
Peter Stuyvesantstraat z/n
San Nicolas Aruba
Phone +297 584-5277 /
+297 584-3939
Fax +297 584-5004


Dept. Arubiana/Caribiana
Bachstraat 5
Oranjestad Aruba
Phone +297 582-6924

Facebook   Google+ YouTube Pinterest LinkedIn